Okzitaniako Landetako Music'O Choeur ahots multzo mistoak kontzertua eskainiko du maiatzaren 18an, igandearekin, 18:00etan, Elosiagako Luzia Donea baselizan. Kontzerturako sarrera doan izango da.
Iaz sortu zuen abesbatza Audrey Droniouk, eta talde horren helburua Frantzia osoan eta Frantziako mugetatik kanpo abestea da, "poza eta emozioa zabaltzeko" eta ongintzazko elkarteei laguntzeko. Elosiagan jatorria duen eta abesbatzako kide den Jose Agustin Huiziren ekimenez egingo dute igandeko kontzertua.
Music'O Choeur abesbatzaren kontzertuko errepertorioak bi zati izango ditu, lehen erdia kantu frantsesak hartuko du eta beste zatia gospelak. Beren kantuek maitasuna, bakea eta arrazakeriaren aurkako borroka jorratzen dituzte. Huizik sortutako euskarazko kantu bat ere abestuko dute.