Maiatzaren 4an izango da kale eta pintura lehiaketa, Arte eta Diseinu Ikastegiak (ADI), Kulturaz kooperatibak eta Azpeitiko Udalak antolatu duten laugarrena. 09:00etan hasiko da lehiaketa, Betharrametako erakusketa aretoan, eta artelanak toki berean aurkeztu beharko dituzte partaideek 13:00etatik 13:30era artean.
Edozeinek parte hartu ahal izango du IV. Kale Pintura Lehiaketan, eta bakoitzak nahi beste lan aurkeztu ahal izango ditu. Hori bai, aurretik, 09:00etatik 11:00etara bitartean, lehiaketako parte hartzaileek laneko euskarriak zigilatu beharko dituzte Betharrametako erakusketa aretoan. Euskarriak aurrez lanerako prestatuta eramatea onartuko dute; ez dute, ordea, marrazki, zirrimarra edo marra aztarrenik eduki behar horiek. Euskarriak gogorra izan beharko du, ondoren egingo duten erakusketan jarri ahal izateko.
Behin euskarriak zigilatuta, lanak kalean eta Azpeitiko lur eremuaren barnean egin beharko dituzte partaideek, edozein teknika edo material erabilita. Lanak "argitaratu gabekoak" izan behar dute, eta, bukatutakoan, Betharram aretoan aurkeztu beharko dituzte partaideek 13:00etatik 13:30era bitartean, egilearen honako datuak adierazita: jaiotze data, nortasun agiriaren zenbakia, herria, helbidea eta telefono zenbakia.
Epaimahaiak erabakia hartu bitartean, hamaiketako eskainiko diete pintura lehiaketako partaideei, Sanagustin kulturgunean.
Bost sari
14:30ean jakinaraziko dituzte lehiaketako irabazleak, eta bost sari banatuko dituzte Betharrametako aretoan: 16 urtetik gorako parte hartzaileen artean, 800 euroko saria emango diote artelan onena aurkeztuko duenari, 500 bigarren lan onenaren egileari eta 300 artelan onena aurkeztu duen azpeitiarrari; 16 urtetik beherakoen artean, berriz, bi irabazle izendatuko dituzte: bat 12-16 urte arteko lan onena egiten duena, eta bestea, 12 urtetik beherako lan onena egiten duena. Iaz Ricardo Azkargorta bergararrak irabazi zuen helduen mailako lehiaketa.
Lehen bi sariak eskuratzen dituzten lanak Azpeitiko Udalaren jabetzan geldituko dira, eta lehiaketara aurkeztutako lan guztiekin osatutako erakusketa zabalik izango da maiatzaren 5etik 18ra bitartean, Betharrametako erakusketa aretoan.
Lotura honetan irakur daitezke lehiaketaren laugarren edizioaren oinarriak.