Iruñeko Alde Zaharreko Erremonte Txapelketaren XI. edizioko finalak izango dira bihar, ostiralarekin, Labrit pilotalekuan, eta lehen mailako lehian ariko den bikoteetako bat Azpeitikoa izango da. Hain zuzen ere, Matxin III.ak eta Ionek Utergaren eta Barricarten kontra neurtuko dituzte indarrak, txapelaren bila.
19:00etan hasiko dira partidak; aurrena promozio mailako finala jokatuko dute Sagasetak eta Leatxek Iturregiren eta Mikelarenaren kontra. Gero izango da Matxin III.aren eta Ionen txanda. Fisikoki egoera "oso onean" iritsiko dira lau kirolariak finalera, eta partida lehiakorra izango dela uste dute txapelketaren sustatzaileek.
Utergak eta Barricartek final laurdenetatik zuzenean sailkatu ziren finalera, bi partida irabazita eta bat galduta. Matxin III.ak eta Ionek, berriz, garaipen bakarra lortu zuten ligaxka horretan, baina hala ere, finalerdietara sailkatu ziren, Otxandorena eta Mitxeo garaituta. Partida hartan lortu zuten finalerako txartela azpeitiarrek. Txapelketaren antolatzaileek Ionek partida hartan erakutsi zuen maila nabarmendu dute.
Finaleko sarreretatik lortzen duten dirua Nafarroako Minbizidun Umeen Elkartera bideratuko dute. 22 urtetik gorakoek hamar euro ordaindu beharko dute sarrera, 16 eta 22 urte bitartekoek bost euro eta 16 urtez azpikoek doan gozatu ahal izango dute partidez.