Kirola eta festa uztartuz, larunbaterako, apirilaren 5erako, Egun Urdina egun beteko egitaraua prestatu dute Marea Urdinak, Lagun Onak mendi bazkunak, Bertan merkatari elkarteak, Kullturaz kooperatibak eta Izarraitz igeri elkarteak.
Goizean, 10:00etan plazatik hasita, 4,5 kilometroko III. Trail Martxa Urdina egingo dute. Eskola kirolean dabiltzan haurrek eta aniztasun funtzionala dutenek parte hartzeko aukera izango dute, eta aurreko edizioetako tankerako ibilbidea egingo dute, Olatz Gabilondo Marea Urdineko kideak azaldu duenez.
Aurten, ordea, Egun Urdinaren barruan antolatu dute txangoa, eta ez aurreko edizioetan bezala, Domusa Teknik 40 MLK probaren egun berean; maiatzaren 10ean jokatuko da mendi lasterketa hori. "Iaz egun berean egin ziren 40 MLK eta 15 MLK probak eta Trail Martxa Urdina, baina egun bakar baterako gehitxo zela ikusi genuen. Hala ere, haurrei aukera eman nahi izan diegu trail batean parte hartzeko, eta lasterketako boluntarioen ekitaldiaren egunean antolatu dugu", azaldu du Gabilondok. Gainera, gerorako bideak errazteko, "txikitatik sentsibilizazioan eragitea" hobe dela uste dute Marea Urdinakoek.
Ibilbide erraza izango da Trail Martxa Urdinarena, eta "denak elkarrekin egitea" da Marea Urdinakoen asmoa. 12:00 alderako iritsiko dira Azpeitiko plazara bueltan, eta han parte hartuko duten haurrentzako hamaiketakoa izango da.
Arratsaldean, berriz, Lagun Onak mendi bazkunak eta Domusa Teknik 40 MLK eta 15 MLK probaren antolatzaileek boluntarioen ekitaldia egingo dute, 19:00etan, Sanagustin kulturgunean. Maiatzaren 10ean jokatuko den mendi lasterketetan boluntario ariko diren herritarrei kamisetak banatuko dizkiete eta haien artean hainbat produktu zozkatuko dituzte, besteak beste.
Igeriketa txapelketa
Arratsaldean ere kirolerako tartea hartuko dute Marea Urdinekoek. Izan ere, Marea Urdina-Izarraitz II. Igeriketa Txapelketa jokatuko dute, 17:00etan hasita, Azpeitiko Udal Igerilekuan. Igeriketa egokituaren Euskal Ligaren denboraldiko lehen jardunaldia izango da larunbatekoa.
Egun Urdinaren egitaraua
- 10:00. Trail Martxa Urdinaren hasiera, plazan.
- 12:00. Trail Martxa Urdinaren iritsiera, plazan.
- 12:30. Jana eta edana haurrentzako.
- 17:00. Marea Urdina-Izarraitz II. Igeriketa Txapelketa, Udal Igerilekuan.
- 18:00-20:00. Boluntarioen kamiseten banaketa, Sanagustin kulturgunean.
- 19:00. Boluntarioen ekitaldia eta zozketak, Sanagustin kulturgunean.
- 20:00. Mokadutxoa boluntarioentzako.
- 20:30-22:30. Oihan Vega DJa.