Udaltzainen hautaketa prozesuaz jardun dute udalbatzarrean, beste behin

Nerea Uranga 2025ko mar. 12a, 15:52

Zinegotziak atzoko udalbatzarrean. (Nerea Uranga)

Udaltzaingoaren kontratazio prozesu bateratua egiteko helburuekin ados badago ere, egiteko moduen gaineko hainbat kezka plazaratu zituen EAJk atzoko udalbatzarrean. Jeltzaleen argudioak banan-banan aletu zituen Nagore Alkorta alkateak. Beste hainbat gai ere landu zituzten martxoko ohiko bilkuran.

Martxoko ohiko udalbatzarreko zerrendako gai bat ez beste kontu guztiak aho batez onartu zituzten atzo Azpeitiko Udaleko EH Bilduko nahiz EAJko udal ordezkariek. Eztabaida nagusiena, baina, galderen eta erreguen txandan sortu zen, EAJk Udaltzaingoaren kontratazio prozesu bateratuari buruz duen iritzia plazaratu zuenean.

Otsaileko udalbatzarrean onartu zuten Azpeitiko Udalak Udaltzaingoaren hautaketa prozesua Zumaiako eta Getariako udalekin batera egitea. Orduko hartan, abstentziora jo zuten EAJko hautetsiek egiteko moduekin ez daudelako konforme, eta atzoko udalbatzarrean gai horren inguruko "bi-hiru gauza" esatea nahi izan zituen Jabier Altuna EAJren udal bozeramaileak.

Hautaketa prozesu bateratua egitearen helburuekin ados daudela azaldu zuen Altunak: "Denok nahi ditugu euskaraz egingo diguten udaltzainak, herria ezagutzen dutenak... Kontua da, non egon da EH Bildu hamalau urtean? Edozein langile publiko herrian errotzea nahi baldin badugu baldintzak eman egin behar direla uste dugu: batetik, lanpostuak atera behar dira, eta bestetik, lan baldintzak bermatu". Altunak adierazi zuen hamabi urtean ez dela lan deialdirik egin Azpeitian, eta ondorioz, beste herri batzuetara joan direla, Azpeitian plazarik ez dutelako atera.

Bakoitzak bere arrazoiak

Lan baldintzengatik beste udalerri batera alde egin duen udaltzain azpeitiarrik ere badela gaineratu zuen atzoko hitzartzean Altunak, eta honako arrazoi hauek aipatu zituen. "Adibidez, festetan lan egindako ordu estrak ez dituzte kobratzen orain, 10.000 biztanletik gorako Gipuzkoako herrien artean hirugarren okerrena da Azpeitia soldatari dagokionez, eskatu dituzten segurtasun neurriak –eskutuak eta abar– ukatu egin zaizkie eta entzun dugu udaltzainen autoetan kamerak eta mikrofonoak jarri direla beraien elkarrizketak-eta entzuteko".

Segidan, EH Bildukoek Arkautiri dioten "alergia txiki hori" ere ez dutela ulertzen esan zuen EAJko bozeramaileak. "Udaltzainei zuzendutako 50 ikastarotik gora eskaintzen dituzte Arkautin, eta horiek ez dira nonbait interesgarriak Azpeitiko Udalarentza; Azpeititik Castellora edota Madrilera joaten dira ikastaroak egitera". Dena den, Udaltzaingoaren deialdi bateratuan euskararen B2 maila eskatzearekin ados daudela esan zuen Altunak, baina maila hori eskatzen duten deialdi guztiak epaitegietan "atzera botatzen" ari direla ohartarazi zuen: "Zalantza daukagu, baldintza hori jarrita, proiektua aldez aurretik zaborretara botatzen ez ote den, zoritxarrez". Halaber, EAJk Azpeitiko Udaltzaingoaz dituen zalantza horiek guztiak plazaratu ostean, herriak eta herritarrek Udaltzaingoaren aldetik "merezi duten" zerbitzu bat izateko plana egitea eskatu zuen Altunak.

Nagore Alkorta alkateak gauzak aldatzea ez dela erraza izaten erantzun zion Altunari, urteen joanak sortutako "inertzia asko" izaten direlako. "EH Bilduk etxeko lan asko eduki ditu egiteko, eta batik bat Azpeitiko Udalean. Pertsonal aldetik, EAJ Udal Gobernuan egon ondoren, udaletxean bitarteko langile askorekin aurkitu gara, eta hori zuzentzea urte askotako lana izan da". Gainera, hark ukatu egin zuen hainbeste urte pasatu direla Udaltzaingoarentzat lan deialdirik egin gabe. "Bat behintzat egin zen, eta aurkeztutakoetatik inork ez zuen gainditu", gaineratu zuen alkateak. Bestalde, Altunak esandakoei erantzunez, udaltzainei ordu estrak sindikatuekin adostuta eta legezko baldintzetan ordaintzen edota konpentsatzen zaizkiela esan zuen. Horrez gain, Azpeitiko Udaltzaingoak eskaintzen duen zerbitzua udaltzainen lan baldintzak bermatuta egiten dela azpimarratu zuen Leire Goenaga EH Bilduko zinegotziak.

Arkautiri inolako alergiarik ez diotela esan zuen alkateak, eta hango arduradunekin harremana dutela gaineratu zuen. "Guk derrigorrez bidali behar ditugu udaltzainak Arkautira, baina hautaketa prozesua guk egitea erabaki dugu herrian gertuko Udaltzaingoa nahi dugulako. Berdin da hautaketa zeinek egiten duen; izan ere, denek formazio bera jasoko dute. Gainera, beste zenbait ikastaro jasotzeko beste nonbaitera joan beharra baldin badago, joan egingo gara". Hizkuntz eskakizunari dagokionez, Azpeitia herri euskalduna izanda, B2 maila eskatzea "gutxien-gutxienekoa" dela nabarmendu zuen Alkortak.

Beste gai batzuk

Gai hori izan zen udalbatzarrean denbora gehien hartu zuena, baina aurretik beste hainbat puntu ere aztertu eta erabaki zituzten. Besteren artean, Trukutxo 31. hirigintza eremuko plan partzialak behin betiko onespena jaso zuen aho batez, eta ondorioz, Eibarko Hierros Servando enpresak Trukutxo eremuan jarduera ekonomikoa martxan jartzeko aukera izango du.

Horrez gain, udal hautetsiek atzo aho batez onartutako gainontzeko gaiak honako hauek izan ziren: Azpeitiko zarata mapa; udalaren eta Ekindar kooperatibaren arteko hitzarmena, ibilgailu elektrikoak kargatzeko puntuak instalatzea formalizatzeko; Azpeitiko Udaleko I. Barne Berdintasun Plana (2025-2028); eta Gipuzkoako Foru Aldundiaren eta Azpeitiko Udalaren arteko lankidetza hitzarmena etxez etxeko laguntza zerbitzua kudeatzeko.

Dena den, puntuetako batean ez zen adostasun osorik izan bi aldeen artean. Hain zuzen ere, EAJk abstentziora jo zuen Azpeitiko kultura sustatzeko helburuz, Azpeitiko Udalaren eta Kulturaz Azpeitiko kultur kooperatibaren arteko hitzarmena beste lau urtez luzatzeko erabakia hartzeko orduan. 2021. urtean sinatu zuten lau urtetarako akordioa, eta udalbatzarrean hala erabakiz gero, beste lau urtez luzatzeko aukera dagoela zehaztu zuen Nagore Alkorta alkateak.

EAJko ordezkariak abstenitu egin ziren. Hegoa Larzabal zinegotzi jeltzaleak azaldu zuenez, Kulturazek bere ibilbidea hasi zuenetik "gizartea asko aldatu da", eta jarraipen batzordeetan esan izan duten gisan, "proiektuak berak behar du egokitzapena, baita aurrekontuak ere". Hori aztertzeko garaia dela iruditzen zaiela esan zuen: "Hitzarmena luzatzeko konpromisoa hartuta, lanean segitzeko denbora daukagu, baina baita azterketa bat egiteko denbora ere. Azterketa denon artean egin behar da, baina batik bat Kulturaz kooperatibak egin behar du azterketa sakon bat, bere proiektua indartzeko, berritzeko, egonkortzeko eta diru iturri berriak lortzeko. Hori egin behar du proiektuaren bideragarritasuna eta independetzia bermatu ahal izateko".

Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide