ELA sindikatuko kide izan zen Kepa Anabitarteri buruzko liburua aurkeztuko du etzi, asteazkenarekin, Eneko Bidegain unibertsitateko irakasleak. Anabitarteren bizitzako ibilbidea jaso du Kepa Anabitarte. Bizitza bat herriari eskainia (Pamiela) lanean.
Aurkezpena Azoka Plazako lehen solairuko aretoan egingo du Bidegainek, 19:00etan hasita. Urolakoen Nafar Zuzterrak taldeak antolatutako hitzaldi zikloaren barruan eskainiko du solasaldia baionarrak. Honako lotura honetan irakur daiteke Berria egunkarian liburuaren harira Bidegaini egindako elkarrizketa.
Anabitarte Pasaiako Trintxerpe auzoan hazi zen, eta ELA sindikatuan militatzearren preso izan zuten. Gero, ELA Berri taldeko arduraduna izan zen. Kooperatibismoan ere jardun zuen, Nabarralderen bultzatzaileetakoa izan zen, Orreaga iritzi taldearen sortzaileetakoa ere bai, eta Gaindegiaren sorreran ere jarri zuen bere alea.