"Veronica Reyes naiz, Irenen ama; Duchenneren giharretako distrofia du Irenek, eta Azpeitian bizi gara. Edozein amak bezala, nire desiorik handiena da nire semea zoriontsu izatea, eta hark bere ametsak bete ahal izatea. Bere pasio handienetako bat futbola da, eta ahal dugun guztia egiten ari gara ahalik eta gehien bizi dezan. Horregatik, powerchair football-eko edo gurpil-aulkiko futboleko lehen taldea sortzeko lanean ari gara Gipuzkoan.
Lehen urratsak egiten ari gara desgaitasuna duten pertsonentzako gurpil-aulkiko futbol talde inklusibo bat osatzeko. Powerchair football kirol zirraragarriak geroz eta indar handiagoa du munduko hainbat lekutan. Hala ere, Euskal Herrian oraindik ez dago ikusgarritasun eta garapen nahikorik, eta hori aldatu nahi dugu. Angelun badago talde bat, Handysport, eta harekin harremanetan gaude. Duela gutxi klub berri bat sortu dute Nafarroan ere, Pamplona Bulls izenekoa.
Zuen laguntza behar dugu proiektua Gipuzkoan errealitate bihurtzeko. Gure helburua da gure lurralde mailako talde bat sortzea eta kirol inklusibo hori sustatzea, pertsonei aktibo mantentzeko aukera emateaz gain, inklusioa, talde lana eta norberaren hobekuntza bezalako balioak ere sustatuko dituena. Funtsezkoa da pertsona guztiek, gaitasun fisikoak alde batera utzita, kirolaz gozatzeko, lagunak egiteko eta trebetasun berriak garatzeko espazioak sortzea. Gurpil-aulkian jokatzen den arren, powerchair football kirol mistoa da, desgaitasuna duen edonori irekia, adina kontuan hartu gabe.
Informazio gehiago nahi duenak futbolaaulkielektrikoaneus@gmail.com helbide elektronikora idatz dezake, edota 679 54 42 53 (Veronica) telefono zenbakira deitu".