2025erako 26,7 milioi euroko aurrekontu propioa izango du Azpeitiko Udalak, eta 27,5 milioi euroko aurrekontu kontsolidatua, Azpeitia Berritzenen aurrekontua kontuan hartuta. Atzo ezohiko udalbatzarrean onartu zuten Udal Gobernuaren proposamena, EH Bilduko hautetsien aldeko botoekin; EAJkoak abstenitu egin ziren.
Aurtengo udal aurrekontuekin ezin dira alderatu datorren urtekoak; izan ere, urtearen amaieran desegingo dituzte Euskara eta Kirol patronatuak, eta horien 2025eko kontuak udal aurrekontu propioan txertatu dituzte. Hala ere, datorren urteko aurrekontu propioa %5 igoko da eta kontsolidatua %3. Gipuzkoako Foru Aldundiaren udal finantzaketarako foru funtsetik aurreikusi baino diru gutxiago jaso du aurten Azpeitiko Udalak: 455.914 euro gutxiago. Hori dela eta, 2025erako %2ko igoera izatea espero du. Gastuen igoerak ere "asko eragin" dute udalaren kontuetan Leire Goenaga Ogasun batzordeburuaren arabera, eta inflazioa izan da beste gakoetako bat: "Adibidez, pandemia aurretik gaur egunera %40ko igoera izan dute obrek".
Onartutako diru partidak "herritar guztientzako kalitatezko zerbitzu publikoak indartzen" segitzeko osatu dituztela nabarmendu zuen Ogasun batzordeburuak, eta berak xehatu zituen diru kontuak udalaren atzoko osoko bilkuran. "Zuhurtziaz, arduraz eta ilusioz" erabakitako kontuak direla adierazi zuen. "Egoera ekonomiko onean dago Azpeitiko Udala, kudeaketa arduratsua eta ona egin delako. Diru kontuak azpeitiar guztiak erdigunean jarrita erabaki ditugu, zenbaki hotz horien atzean pertsonak daudelako".
Zerbitzuak indartzeko
"Ikusten eta ukitzen ez diren" zerbitzuetan jarri dute indarra, Goenagaren arabera; besteak beste, gazteria arloko zerbitzuak, aholkularitza zerbitzuak, kirol zerbitzuak eta Emakume Txokoa aipatu zituen.
Gazteria Sailean 200.000 euro gehiago aurreikusi dituzte. Izan ere, Gaztelekuan erabiltzaile kopurua gehitu egin da, eta hezitzaile bat gehiago kontratatuko dute. Hezitzaileen hitzarmenak ere hobetu egingo dituzte. Oporraldietarako haurrentzako eta nerabeentzako prestatzen den eskaintza ere "zabaldu" egin dutela azpimarratu zuen Goenagak.
Azken urteetan "igoera handiena" izan duen sailetako bat Gizarte Zerbitzuena izan da, eta horren barruan, etxez etxeko zerbitzuak datorren urtean 900.000 euroko aurrekontua izango duela zehaztu zuen Goenagak: "Aurten baino 100.000 euro gehiago aurreikusi dira, urtez urte zerbitzuaren eskaera handiagoa delako". Udalak herritarren ongizate emozionala zaintzeko jarri dituen aholkularitza eta bide laguntza zerbitzuek ere segitu egingo dute 2025ean. Gainera, Azpeitiko Udalak herri mailako zaintza plan bat egiteko asmoa ere baduela aurreratu dute udal ordezkariek, eta 2025erako diru partida bat aurreikusi dute horretarako.
Herritarren "bizimodua errazte aldera", gainera, udalak beste zerbitzu garrantzitsu batzuk ere badituela gogorarazi zuen Goenagak; energia eta etxebizitza bulegoak, esaterako.
Igo egingo dute, bestalde, kirol zerbitzuetarako diru partida ere; 290.000 euro gehiago aurreikusi dituzte datorren urterako. Urtarriletik aurrera ordu erdi lehenago irekiko dituzte udal igerilekuko kirol instalazioak eta ordutegi zabalagoa izango dute; 06:30ean zabalduko dituzte. Uda garaian, berriz, kanpoko igerilekua egun gehiagotan zabalduko dute. Kirol azpiegituretako langileen baldintzak ere hobetu egingo ditu udalak.
Udaltzainen lantaldea ere handituta du Azpeitiko Udalak "segurtasuna bermatzeko", eta zerbitzu orokorretan ere langile gehiago kontratatuko dituztela adierazi zuen atzo Goenagak. Denera, 24 udaltzain eta administrari bat ari dira lanean herriko Udaltzaingoan, eta 24 orduko zerbitzua eskaintzen dute horiek. "Beste hainbat herritan ez bezala, gaueko txanda ere badu Azpeitiak. Hogei udaltzaineko taldea da lanean jarduten duena, eta launa udaltzaineko bost talde daude".
Kalitatezko zerbitzuak eskaintzeko, indartzeko eta eguneratzeko, langileen arloan %9ko igoera onartu du udalak datorren urterako, eta udal langileen soldatetan %2,5ekoa.
Etxebizitza eta inbertsioak
Etxebizitza Planean adostutako neurriekin lanean jarraitzea aurreikusita du erakundeak, eta datorren urtean etxebizitza hutsak merkaturatzeko ahalegin berezia egingo duela aurreratu du. Horretarako, 100.000 euroko laguntza onartu du udalak. Gainera, Alde Zaharreko eraikin zaharrak erosten eta berriak eraikitzen jarraituko du, Azpeitia Berritzenekin eta Eusko Jaurlaritzarekin elkarlanean. Erdikalean babestutako hamabi etxe eraikitzeko asmoa du erakundeak, eta Elizkalean, alokairurako hamasei. Santutxo auzoan eraikitzeko asmoa duen 28 etxebizitzen proiektua egikaritzen jarraitzea ere nahi dute 2025ean.
Datorren urterako inbertsioetako batzuk aipatu zituen atzo Goenagak: Etxe Alaiko urbanizazioren bigarren fasea (275.000 euro), herri bideak eta urbanizazio lanak (250.000 euro), Udaltzaingoaren eraikin berria egokitzea (280.000 euro), Perdillegiko musika eskolaren lehengo eraikina bota eta txukuntzea, Goikokaleko 2. zenbakidun eraikina eraistea (udalari itsatsita dago eraikin hori; eraitsi eta eraikiko duten eraikina udaletxearen osagarria izatea da asmoa) eta Euskal Herria auzoan kokatuta dagoen Uztaro haur eskolaren ondoko gunea txukuntzea eta egokitzea.
Udaltzaingoaren egoitza Plaza Txikitik Olazko Andre Mariaren plazaren atzeko aldera lekualdatuko dute. Udalak dagoeneko erosita du lokala, eta datorren urtean egoitzaren proiektua egin eta lehiaketara atera beharko du. "Plaza Txikiko lokala txikia gelditu da, eta handitzeko obrak egiteko hainbat baldintza ez ditu betetzen. Beraz, lekuz aldatzea erabaki dugu", adierazi du Goenagak.
Udalak beste hainbat proiektu ere baditu eskuen artean –Garmendipen, kiroldegian, Urrestillako pilotalekuan... egitekoak–, baina horiek martxoa eta apirila bitartean erabakiko ditu, "aurtengo aurrekontuen gerakinaren arabera", zehaztu du Ogasun batzordeburuak.
Tokiko ekonomia eta trantsizio energetikoa
Tokiko ekonomia lehiakor eta berritzailea sustatzera 400.000 euro bideratuko ditu udalak datorren urtean, eta Iraurgi Berritzeni, berriz, 436.827 euroko ekarpena egingo dio, "tokiko ekonomia, enplegua eta turismoa bultzatzeko". Halaber, erakundeak lehen sektorea indartzearen aldeko ahaleginean ere segituko duela azpimarratu zuen udalbatzarrean Goenagak.
Herri jasangarriago bat helburu, ingurumen, mugikortasun eta energia alorretako hainbat proiektu aurreikusi dituzte 2025erako: hiru ikastetxeetako lau eraikinetan eguzki plakak jarriko dituzte eta herriko enpresei plakak jartzeko laguntza eskainiko die. Argiteria LED sistemara aldatzeko planarekin jarraituko du erakundeak, eta auto elektrikoentzako birkarga puntu berriak jarriko ditu. Horrez gain, Sanjuandegiko eta Landetako bidegorriak lotuko dituzte Euskal Herria auzoan, eta bizikletentzako aparkaleku itxiak jarriko dituzte herriko hainbat puntutan. Datorren urtean, herri autobusa jartzea ere aztertuko du udalak.
Aurrekontuetan "dena" da garrantzitsua, Ogasun batzordeburuaren ustez: "Azken euroraino da inportantea, horregatik gauza guztietan indarra jartzen saiatu gara, kontuak zuhurtziaz prestatuz".
EAJren abstentzioa
2025eko udal aurrekontuak onartzerakoan abstenitu egin ziren atzo EAJren udal taldeko kideak. Hala azaldu zuen Nerea Aldai hautetsiak beren jarrera: "Udal batzordeetan aurrekontuetarako hainbat ekarpen egin ditugu; batzuk kontuan hartu dira eta beste batzuk ez, irizpide desberdinak tarteko. Besteak beste, horregatik, abstenitu egingo gara". Horrez gain, zuhurtziaz jokatu beharra dagoela nabarmendu zuen jeltzaleak. "Udalaren egoera ekonomikoa egokia da, baina sarrerak %5 igoko dira eta gastuak %10. Pertsonal gastuak eta zerbitzuenak igo egingo dira, baina aurrera begira kalitatezkoak diren begiratu beharko dira banan-banan".
Nagore Alkorta alkateak hartu zuen segidan hitza, eta azpimarratu zuen 2025eko udal aurrekontuak "zuhurrak eta arduraz erabakitakoak" direla. Segidan, herriko hainbat gunetako plan bereziez eztabaidatu zuten bi alderdietako ordezkariek, hala nola Sierbeteko komentuaz eta Amueko eremuaz. Sierbetakoaren kasuan, "aukerak eta ateak ugari" direla azaldu zuen alkateak, eta gaur-gaurkoz ekipamenduetarako eremu gisa izendatuta dagoela eremu hori.
Aho batez, diru laguntzen plana
Udal aurrekontuei lotuta, datorren urterako Diru Laguntza Plan Estrategikoa ere onartu zuten udal hautetsiek atzoko udalbatzarrean. Plan horrek erakundeak herriko eragileei eta elkarteei ematen dizkien diru laguntzak jasotzen ditu, eta 2025ekoa aho batez onartu zuten.