31 urtez Azpeitiko Parrokian elizgizon aritu ostean, Zarauzkoaren ardura hartuko du Kepa Susperregik. Hori dela eta, Parrokiaren bueltako herritarrek agur beroa egin zieten atzo, larunbatez; elizkizuna izan zen parrokian, eta ondoren, bazkaria egin zuten 400 lagun inguruk Kiruri jatetxean.
Gaur, berriz, Elizaren agurra jaso du Susperregik. Izan ere, gaur gauzatu du lekualdatzearen ekitaldi ofiziala Azpeitiko parrokian Gipuzkoako Elizbarrutiak. Hain zuzen ere, Susperregi Azpeititik agurtzeko eta Jose Ignacio Eguzkitza parroko berriari ongietorria emateko meza egin dute gaur. Beraz, aurrerantzean, Eguzkitza izango da Azpeitiko erretore berria.
Jose Ignacio Eguzkitza parroko berria. (Urtzi Oteiza)
