Zezenketen kontra inoiz baino mobilizazio gehiago deitu dituzte aurten saninazioetarako animalistek. Oinatz elkarte animalistak eman du datorren asterako prestatu dituzten deialdien berri, eta uztailaren 30etik abuztuaren 2ra, saninazioetako lau egunetarako deitu dituzte protestak.
Ohi bezala, hiru zezenketa izango dira saninazioetan –uztailaren 31n, eta abuztuaren 1ean eta 2an–, eta hiru egunetarako deitu dituzte animalistek ordubeteko elkarretaratzeak zezen plaza aurrean, 17:30etik 18:30era. Baina uztailaren 30ean, San Inazio bezperako txupinazoan, egingo dute aurten lehen protesta zezenketen kontrakoek. 11:30ean Perez Arregin elkartu, eta handik plazara joateko deia egin du Oinatzek datorren astearterako.
Sinadura bilketa
Maiatzean egindakoarei jarraipena emanez, tauromakia kultur ondare gisa arautzeko legearen kontrako sinadurak biltzeko ere baliatuko dituzte animalistek aurtengo saninazioetako elkarretaratzeak.
Oinatz elkarte animalistak "denak gonbidatu" ditu bai elkarretaratzeetan parte hartzera, bai sinadurak ematera.