Sansebastianetarako prest dago Azpeitia, baita Guka ere. Azken urteetan bezala, gaur, San Sebastian bezpera, zuzeneko saio berezia eskainiko du Gukak Azpeitiko plazatik. 21:30etatik 22:00etara sansebastianei lotutako erreportajeak izango dira ikusgai Urolakosta.hitza.eus-en, Uztarria.eus-en eta Erlo Telebistan, eta, 22:00etatik aurrera, danborrada zuzenean ikusteko aukera izango da. Ondoren, 23:15ean hasita, zuzeneko berezia eskainiko du komunikazio taldeak, Azpeitiko udaletxetik.
Aurten, Iñaki Odriozola eta Nerea Arakistain arituko dira aurkezle lanetan, eta hainbat gonbidaturen bisita jasoko dute. Gainera, iaz bezala, plazara jaitsiko da Maialen Etxaniz, eta bertatik bertara jasoko ditu herritarren adierazpenak.