Antton Ao Povo-Etxerak, Antton Olaizola deportatuaren aldeko ekimenak, txosnaren partez jantokia jarriko du aurten Zestoako Ama Birjina jaietan. Gestoria-Kutxa parean, Laranjadi plazaren barren aldean, jarriko dute jantokia hiru egunetan, eta ogitartekoak erosteko zein bertan jateko aukera eskainiko dute han.
Irailaren 2an, larunbat honetan, irekiko dute lehen aldiz jantokia; Gazte Egunarekin batera, Olaizolari babesa agertzeko argazkia eta herri bazkaria egingo dituzte aurten ere plazan. Amabirjinetan, berriz, irailaren 8an eta 9an izango da martxan jantokia. Hiru egunetan, 19:30etik 23:00etara; jantokia irekitzen duten ordutik hasita, jatekoa zein mahaia aurrez erreserbatzeko aukera ere eskainiko dute.