Gaur, asteartea, inauguratu dute Izarraitz Atea parkeko skate parke berria. Skate mundua gustuko duten dozenaka haurrek, nerabek zein gaztek parte hartu dute ekitaldian, eta horiek skate pistetan dituzten abileziak ere nabarmendu gelditu dira. Udalaren izenean, berriz, Mikel Odriozola Festa zinegotziak, Egoitz Arruti Kirol zinegotziak eta Ainara Larrañaga Gazteria zinegotziak parte hartu dute inaugurazio ekitaldian.
Skate parkeak hiru altuera desberdin ditu sakonune handi bat du. Horrez gain, kaleko parkea ere badu, baranda baxuekin eta bestelako koxka nahiz malda batzuekin. Odriozolak nabarmendu du, udalak skate parkea egiteko eskaera jaso zuela parte hartze prozesuaren eta Gazteriaren bitartez. "Sanjuandegiko parkea aztertu genuen, eta ikusi genuen hango skate parkea zaharkituta zegoela. Proiektu txiki bat ere egin genuen berritu zitekeen edo ez ikusteko, baina gaur egungo modalitate desberdinetarako ez zegoen gunea egokituta. Horregatik erabaki zuen udalak berria egitea".
Udalak proiektu berria Izarraizko Atea parkean egitea erabaki zuenean, erakundea skate zaleekin jarri zen harremanetan. Hala adierazi du Odriozolak: "Oso gustura gaude egin dugun parte hartze prozesuarekin. Skate zaleekin elkarlanean egin dugu parke berria. Hasiera, bilera bat egin genuen gazteekin, horiek zer behar zituzten jakiteko eta zer nolako skate parkea nahi zuten ezagutzeko. Ideia batzuk jaso ondoren, proiektuaren lehen zirriborroa egin genuen eta horren gainean moldaketak egiten joan gara ondoren". Era berean, zinegotziak nabarmendu du skate zaleek zuzenean parte hartu dutela proiektuan. "Skate parke hau skate zaleek egindakoa izan da hein handi batean, beraiek zuzeneko harremana izan baitute skate parke hau egin dutenekin".
Aurrerantzean, skate zaleek beren gunea izango dutela nabarmendu du Odriozolak. "Euskal Herriko skate parken artean erreferentea izatea nahi dugu Azpeitikoa. Asmoa izan da skate parke handi bat egitea, ikusi baitugu herrian afizioa dagoela". Odriozolak gaineratu du, skate kirola maite dutenentzako "elkargunea" izango dela parke berria. "Belaunaldi desberdinen gunea izango da, eta erabiltzaileek bertako arauak errespetatzea eta zaintzea espero dut. Goza dezatela".
Skate zaleak, "gustura"
Iñigo Garcia skate zaleak nabarmendu du "joko handia" emango duen parkea izango dela Izarratz Atea parkeko gunea. "Parkea egin dutenek esan digute oso handia eta ona dela, eta gerora ere urtero txapelketak egiteko aukera emango duela". Gaztearen arabera, skate zaleak ez ziren arduratu duela gutxira arte Sanjuandegiko skate parkearen egoeraz, baina azken urteetan egoera txarrean ikusten zuten hura. "Skate parkearen egoera ikusita, ez zen jende gehiegi hurbiltzen parke hartara. Orduan eskatu genion udalari parke berria egiteko proiektua egiterik ba al zegoen".
Garciak uste du kirol desberdinak egiteko aukera emango duela skate parke berriak. "Bizikletan, skatean edo monopatinean ibili daiteke parke honetan. Halere, irudimena martxan jartzen ere lagunduko du guneak, gauza asko egiteko aukera ematen baitu. Hasieran kostatu egingo zaigu ohitzea, baina denboraren poderioz jende gehiago hurbilduko den itxaropena dugu; izan ere, badakigu herritik kanpoko jendea hona etortzeko gogotsu dagoela. Kirol honek indarra hartuko du herrian, eta oso gustura gaude".
Uztailaren 9an, festa
Skate zaleek, udalaren laguntzarekin, skate parke berria behar bezala inauguratzeko festa antolatu dute uztailaren 9rako. Goizean, haurrentzako tailer bat eskainiko dute Izarraizko Atean. Jakinarazi dute gunea musikak girotuta egongo dela une oro. Gainera, grafitigileek muralak margotuko dituzte parkearen bueltan jarriko dituzten zenbait paneletan.
Eguerdian, berriz, bazkaria egingo dute, eta arratsaldean, skate erakustaldia. Ikuskizunean parte hartuko duten kide guztiak oraindik lotu gabe badituzte ere, izen batzuk aurreratu ditu Garciak. "Jende ona dator, munduko, Espainiako eta Euskal Herriko skaterrak. Red Bulleko kideak diren Dani Leon eta Sergio Layos etortzekoak dira, baita Ian Porciano, Larrun Barrenetxea ere. Teresa Williams, aldiz, zalantzan dago". Eguna amaitzeko, berriz, parrillada egingo dute guztiek batera, eta gauean Ugalde DJak emanaldia eskainiko du.