Koronabirus kasuak ugaritzen doaz egunez egun, eta datu kezkagarriak ikusirik, Azpeitiko Udalak hainbat neurri berezi hartu zituen atzo –ostirala–. Ondorioz, hainbat zerbitzutan aldaketak izango dira. Neurri horiek kirol instalazioetako, liburutegiko, euskaltegiko eta Emakumeen Txokoko erabiltzaileei eragingo die. Herriko eragileekin ere harremanetan da udala, eta erakundearen arabera, eragile denek beren jarduna etetea edo protokolo neurriak zorroztea erabaki dute.
Kirol instalazioei dagokienez, igerilekuko eta gimnasioko edukierak murriztu dituzte. Igerilekuan, kale bakoitzean pertsona bakarra ibiliko da; igerileku txikian bi familia egon daitezke aldi berean. Gimnasioan, berriz, guztira 30 lagun elkartuko dira gehinez (hamabost kardioan eta hamabost fitnessean), eta pertsona bakoitzak astean ordubeteko hiru txanda hartzeko aukera izango du. Horrez gain, kirol jarduerak bertan behera gelditu dira, behin-behinean. Teniseko, padeleko eta mahai teniseko guneek bi laguneko edukiera dute. Saskibaloi kantxan, saski bakoitzeko pertsona bat ibiliko da, eta futbol zelaian, ate bakoitzeko pertsona bat. Neurri horiek zorrotz betetzeaz gain, zerbitzua jasotzerakoan eskuak garbitu eta maskara jantzi behar direla (kirola egiterakoan salbu) gogorazi diete herritarrei.
Azpeitiko Udal Euskaltegian ere segurtasun protokoloak zorroztu dituzte; aurrez aurreko saio kopurua murriztuko dute, ikasleen segurtasuna bermatzeko. Emakumeen Txokoan, berriz, aurreikusten diren ekintzak streaming bidez egiteko asmoa dute; hori posible ez bada atzeratu egingo dituzte. Era berean, hainbat ikastaro online eskainiko ditu Emakumeen Txokoak, eta beste batzuk behin-behinean eten egingo dituzte.
Liburutegian ere aldaketak
Azpeitiko Udal Liburutegian ere COVID-19 gaitzaren hedapena murrizteko neurriak zorroztuko dituzte. Oraingoz, bi dira hartu dituzten erabakiak: bertan behera utzi dituzte hurrengo asterako antolatutako ekintzak eta liburutegiko apalategiak itxi dituzte.
Hartutako prebentzio neurriak tarteko, liburuak edo DVDak maileguan eraman nahi dituzten herritarrek debekatuta izango dute horiek apalategietatik zuzenean hartzea, eta, horrenbestez, harrerako liburuzainei jakinarazi beharko diete zein den etxera eraman nahi duten mailegua. Haurren gunea nahiz bertako apalategiak ere itxita mantenduko dituzte
Azpeitiko Udal Liburutegiko ikasgelek irekita jarraituko dute, oraingoz. Liburutegiko arduradunek jakinarazi dutenez, orain arteko neurriak "zorrotz" bete beharko dituzte ikasgelak erabili nahi dituzten pertsonek. Ikasgelak erabiltzeko ezinbestekoa izango da maskarilla jantzita izatea uneoro eta sarrera-irteeran gel hidroalkoholikoa erabiltzea.
Neurriak zorroztuko dituzten arren, Liburuak Etxera zerbitzuak martxan jarraituko du, liburu gosez eta irakurketa egarriz dauden herritarren gozamenerako. Liburutegiko arduradunek adierazi dutenez, "etxetik atera ezin duten, gaixotzeko beldurra duten edo besterik gabe liburuak etxean jaso nahi dituzten herritarrek eska ditzakete liburuak maileguan".
Eskaerak astelehenetik ostiralera 09:00etatik 13:00etara bitartean jasoko dituzte liburutegian, telefonoz (943-15 71 95), Whatsapp-ez (688 815 506) edo posta elektronikoz (liburutegikoharrera@azpeitia.eus).
Eragileekin elkarlanean
Udalak azaldu duenez, "egunez egun" jarraituko dute herriko datuen bilakaera, eta "beharrezko neurriak hartzen edo egokitzen" jarraituko dute. Horrez gain, atzotik kultur, kirol zein eragile sozialekin erronda bat egiten ari da erakundea. Eragile guztiek udalaren irizpideekin bat egin eta beren jarduerak etetea edo orain arteko protokoloak zorroztea erabaki dute.