Urtebete pasatu da Azpeitiko apustu etxeak ateak ireki zituenetik, eta urtemuga horren harira Elkar-ekinek ekimen berezi bat prestatu du azaroaren 22rako. Hain zuzen, egun horretan apustu etxearen aurrean elkarretaratze zaratatsua egingo du Elkar-ekinek, eta herritarrei dei egin die zarata ateratzeko txistuekin eta tresnekin bertara daitezen.
Apustu etxearen aurkako elkarretaratzearekin bat eginez, Azpeitiko hainbat taldek eta norbanakok argazkia atera zuten atzo, osteguna, arratsaldean Azoka Plazan. Besteak beste, ELA, LAB, EH Bildu, Gaztetxea, Ernai, Basanderiek, XJ Auzolanean, Urrestillako Festa Batzordea, Marea Arroxa, Ikasberri Kirol Elkartea, Krisiaren Seme-Alabak, Orkatz Kultur Elkartea eta Erniarraitz bertsozale elkarteko kideak agertu ziren argazkia ateratzera. Horiez gain, argazkira animatu ziren azken urtean apustu etxearen kontra egindako ekimen ezberdinetan parte hartu duten kuadrillak eta norbanakoak.
Azaroaren 22ko protesta 19:00etan izango da, Balentina Agirre plazan dagoen apustu etxearen aurrean.