Uztailaren 28an, igandea, izango da aurtengo Ume Eguna, eta Marea Arroxak dagoeneko prest du bere egitaraua. Umeen eta Gaztetxoen Egun Arroxa antolatu du festa herrikoien aldeko batzordeak beste urte batez, eta bertan parte hartu nahi duten lagunek bihar edo etzi egin beharko dute izen-ematea. Egun horietan, 12:00etatik 13:30era eta 17:00etatik 19:00etara jarriko dute izena emateko mahaitxoa plazan. Izen-ematea sei euro ordaindu beharko da, kamiseta barne. Aurreko urteko kamiseta erabiliko dutenek, aldiz, lau euro ordaindu beharko dute izen-ematea. Festa batzordeak kamisetak berrerabiltzeko deia egin du.
Bazkaria, jolasak, kantaldia eta kalejira antolatu ditu festa herrikoien aldeko batzordeak Umeen eta Gaztetxoen Egun Arroxarako. 14:00etan elkartuko dira ekintzetan parte hartzera animatzen diren gaztetxoak. HH4ko eta HH5eko haurrak Frontoi Txikian elkartuko dira; LH1, 2 eta 3 mailetako gaztetxoak Done Jakue kaleko parkean; eta LH4, 5 eta 6 mailetako lagunak Ludoteka aurrean izango dute hitzordua. Behin elkartuta, bazkaria egingo dute, eta ondorengorako jolasak, dantzaldia eta kalejira antolatu ditu Marea Arroxak. Kalejira amaitzean, 17:30 aldera, gurasoekin elkartuko dira berriro gaztetxoak.