Mikel Larrañaga azpeitiarra eta Iker Vicente nafarra dira ekainaren 7an Azpeitian jokatuko den Urrezko Aizkolarien Banakako Txapelketaren aurreneko bi finalistak; asteburuan Gasteizen eta Navaridasen (Araba) jokatu diren bi finalaurrekoak irabazi dituzte, hurrenez hurren, eta horrenbestez, zuzenean sailkatu dira txapela erabakiko duen saiora.
Finalean lehiatuko den hirugarren protagonistaren izena falta da jakiteko, eta hori Ruben Saralegi nafarraren eta Julen Alberdi Txikia IV.a azkoitiarraren artetik aterako da. Saralegi bigarren sailkatu zen Gasteizko saioan, Larrañagaren atzetik eta Aitzol Atutxaren aurretik, eta bigarrena izan zen Txikia IV.a ere atzo Navaridasen, Vicenteren atzetik eta Rekondoren aurretik. Hain zuzen ere, bi finalurrekoetako bigarren sailkatuen arteko buruz burukotik aterako da Azpeitiko finalerako azken txartelaren jabea. Datorren igandean, hilak 25, jokatuko dute norgehiagoka hori Txikia IV.ak eta Saralegik, Bilboko Zorrotzan.