Apirilean izan ziren Haurren Liburuen Nazioarteko Eguna (apirilak 2) eta Liburuaren Nazioarteko Eguna (hilak 23), eta urtero legez data horien bueltan hainbat ekintza antolatu ditu Udal Liburutegiak. Batzuk egin dituzte dagoeneko, baina Liburuaren Nazioarteko Eguna Pazko Astean egokitu zenez, aste honetan eta hurrengoan jarraituko dute data horien bueltan antolatutako ekintzekin. Gainera, liburutegiaren 55. urtemuga ospatzeko ere baliatuko dituzte ekitaldiak.
Etzi, maiatzak 7, irakurketa errazaren festa egingo dute Biharko eguneko zentroko eta Goienetxe fundazioko kideek. Hain zuzen ere, irakurketa saio berezia egingo dute liburutegian, eta segidan, hamaiketakoaz gozatuko dute. Ostegunean, berriz, hitzak eta musika uztartuko dituen emanaldia izango da Enparan Dorretxean; izan ere, Egoitz Arrutik, Iraia Bereziartuak eta Eider Bereziartuak osatutako Inharrak taldeak poesia musikatu saioa eskainiko du bertan, 19:00etatik aurrera.
Ostiralean hainbat ekintza izango dira. Goizean, 11:00etan, Enparan Dorretxearen historia ezagutu ahal izango dute herritarrek Juan Bautista Mendizabal historialariak eskainiko duen bisita gidatuari esker. Saio horretan parte hartu nahi duten herritarrek bihar izango dute izena emateko azken eguna; horiek liburutegian eman beharko dute izena. Ostiral arratsaldean, 17:00etatik aurrera, berriz, liburutegia kalera aterako dute. Jolasak, aurpegi margoketa, eskulanak eta Julen Magoaren saioa izango dira Enparan Dorretxearen atarian. Julen Magoaren saioa 18:30ean hasiko da.
Datorren astean ere izango da zer egin liburutegian. Izan ere, astelehenean, 2 eta 3 urteko haurrei zuzendutako ipuin kontaketa saioa eskainiko du Yolanda Arrietak, 18:00etan hasita. Hilaren 16an, ostegunez, berriz, LH3 eta LH6 arteko umeentzat eskulan tailerra izango da. Saio horretarako izena eman beharko da maiatzaren 14a bitartean, liburutegian edo ludotekan.
Maiatzaren hondarrean, berriz, haurren bisitaldiak, Urrestillan liburutegi zerbitzua eskainiko dute, literatura solasaldia, marrazketa saioa eta irakurleen txokoko festa egingo dituzte.
Ikusi egitarau osoa, hemen:
- Maiatzak 8, asteazkena: Irakurketa errazeko festa, Biharko eguneko zentroko eta Goienetxe fundazioko kideekin, 11:00etan.
- Maiatzak 9, osteguna: Errezitaldia, Inharrak taldearekin, 19:00etan.
- Maiatzak 10, ostirala: 10:30ean, bisita gidatuak, Juan Bautista Mendizabalekin. Arratsaldean, liburutegia kalera aterako dute: jolasak, makilaje tailerra, eskulanak eta Julen Magoa, 17:00etatik aurrera.
- Maiatzak 13, astelehena: Ipuin kontaketa saioa Yolanda Arrietarekin, 2 eta 3 urte bitarteko umeentzat eta gurasoentzat, 18:00etan.
- Maiatzak 16, osteguna: Eskulanak, L.H. 3 eta 6 maila bitarteko umeentzat, 18:00etan.
- Maiatzak 22, asteazkena: Haurren bisitak.
- Maiatzak 23, osteguna: Urrestilan liburutegi zerbitzua, 18:00etatik 19:15era arte.
- Maiatzak 28, asteartea: Literatur solasaldia Fakirren ahotsa liburuaren inguruan, 18:00etan.
- Maiatzak 29, asteazkena: Marrazketa saioa 3 eta 6 urte bitarteko umeentzat, 17:30ean.
- Maiatzak 30, osteguna: Irakurleen Txokoaren festa, 18:00etan.