Irudietan: Corrado Masacciren txotxongilo erakusketa Azpeitian

Azpeitiko XXXVI. Euskal Antzerki Topaketetako egitarauaren barruan, Corrado Masacci txotxongilo sortzailearen erakusketa dago zabalik Azpeitiko Betharrametako udal erakusketa aretoan. Txontxongilo egilearen 40. urteurrena da erakusketaren izenburua, eta bertan txotxongiloak egiten hasi zenetik gaur egunera arte sortu dituen pieza batzuk ikus daitezke. Azaroaren 18ra arte egongo da erakusketa irekita; astelehenetik ostiralera, 18:00etatik 20:00etara eta larunbat eta igandetan, 12:00etatik 14:00etara. Erakusketaren gidaria Masacci bera da, eta bisitatzera doazenak harritzeko eran jartzen ditu mugimenduan txotxongiloak. Azpeitiko Euskal Antzerki Topaketetan erakusketa jartzen duen laugarren urtea du, "publiko fidela ere badut, badira haur batzuk egunero-egunero erakusketara datozenak", adierazi du Masaccik. Datozen bi asteetan erakusketako agenda bete-betea duela adierazi du artistak: "Herriko eskola umeak etorriko dira goiz eta arratsaldetan, eta, gero, ikustera etorri nahi duen jende guztiarentzako irekita egongo da erakusketa". Sortutako azkenetako txotxongilo bat hartu eta honakoa dio: "Saninazioetan Azpeitian izaten den erraldoien desfilera gonbidatu ninduten, eta, desfilea ikusi ondoren, txotxongilo hau egiteko ideia sortu zitzaidan", dio txotxongilo txiki bat mugimenduan jarriz.