Aritz Azpiazu 'Arria VI'.a: "Pentatloia izango da nire lehendabiziko lehiaketa herri kiroletan"

Aritz Azpiazu 'Arria VI'.a. (Mailo Oiarzabal) Zapaturako pronto? Bai. Uda guztia eman dugu zapatukoa prestatzen. Entrenamendu batzuk hobeak eta beste batzuk txarragoak egin ditugu, baina uste dut prest gaudela. Noiztik ari zara prestatzen pentatloirako? Orain dela hiru bat hilabete, osaba-eta ikusten nituen entrenatzen. Probatu behar nuela pentsatu, eta horrela egin nuen. Moldatu nintzen, eta aurrera. Nola prestatzen da horrelako proba bat? Entrenamendu asko eginda. Ni aizkoran ibilita nengoen, baina harri jasotzen inoiz ez horrela, behar bezala. Horregatik, harri jasotzen astean bi entrenamendu saio egiten aritu naiz, horretan saiatu naiz gehien. Azkenean, dena konbinatu behar duzu: aizkora, harri jasotzea, korrika, txingak... denak entrenatu behar dituzu. Astean bi edo hiru saio konpleto samarrak eginez ibili naiz, denetik pixka bat egiten, ahal zen moduan. Gogorra egin al zaizu? Bai. Izan ere, alde handia dago, kirol modalitate bakarra lantzetik, bat-batean beste lau sartu behar izatera. Baina moldatu naiz, pixkanaka. Espero zenuena baino errazagoa ala zailagoa egin zaizu bost jarduerak tartekatzea? Harri jasotzea kenduta, beste guztiak espero nuen bezala prestatu ditut. Harri jasotzearekin gorabehera handiagoak eduki ditut, baina azkenean nahikoa gustura gelditu naiz. Hasieran, Errezilgo gure baserrian egiten genituen entrenamendu saioak. Baina azken bi hilabeteetan Izeta harri jasotzailearekin ari gara entrenatzen, Zarautzen. Mutil garaia naiz, eta kilo askoduna ez, eta harri jasotze lanak ez dira  egiten nire gorputz klaserako. Hortxe saiatu behar izan naiz gehien, teknika aldetik eta; eta dakien batekin arituta, askoz gehiago ikasten da. Hasi berri duzun kirol ibilbideko erronka handiena izango da zuretzat pentatloia. Bai, noski. Orain arte, herri kiroletan txapelketa bakar batean ere ez naiz lehiatu; aizkoran pare bat erakustalditan parte hartu dut. Aurretik triatloiak egiten nituen, eta batik bat, bizikletan ibiltzen nintzen, baina pentatloia izango da herri kiroletako nire lehendabiziko lehiaketa herri kiroletan. Hasiera gogorra aukeratu duzu, inola ere. Bai, hala da, baina erronka bereziei aurre egitea ere ona izaten da. Saiatu beharra dago zerbait desberdina egiten. Nola etorri zen bizikletatik aizkorarako jauzia? Etxean beti ikusten nuen aizkora eta probatzea erabaki nuen. Pixkanaka hasi, gustatu, zaletasun ikaragarria piztu, eta begira non bukatu dugun. Arriatarren azken ezpala zara, momentuz. Zer pisu du zuretzat Arria izenak, onerako zein txarrerako? Bietatik dauka. Herri kiroletan gauza asko egindakoa da nire familia. Denak dira, gainera, onak izandakoak; denek dute lorpenen bat poltsikoan. Alderdi ona da hasterako jada ezaguna zarela, eta horrek lagundu egiten du, jende gehiago ezagutzen duzu hasieratik. Txarra, berriz, presio pixka bat gehiago dakarrela berekin izenak; jendeak espero du egingo dituzula direnak eta ez direnak, Arria zarelako. Baina nik lasai hartzen dut. Bakoitzak ahal duena egiten du; aurrekoen bezain ona ateratzea zaila da, baina ahal dudana egingo dut, eta ea zer irteten den. Osaba aurkari izango duzu etzi. Aholkulari ere izan al duzu? Bai, batera entrenatu dugu ia egunero, elkar lagunduz. Familiako bat ondoan izateak asko laguntzen du, eta osabarekin dudan konfiantza izanda, gehiago. Baina zapatuan kontra ariko gara eta hor alferrik izango dira aholkuak eta adiskidetasunak. Badu bere grazia, hala ere, eta ilusioa egiten dit. Eta aitonak, zer dio? Asko daki eta aholku asko ematen ditu. Lehenengo plaza izateko oso lan gogorrak direla esaten dit, eta lasai hartzeko; bereziki hori, urduritasunari eusteko.

Seikotea Euskal Pentatloi Txapelketaren bila Hogeita zortzi urte eta gero, Euskal Pentatloi Txapelketa berreskuratua jokatuko dute etzi Azpeitiko zezen plazan, eta ezohiko ordutegiarekin: gauez jokatuko dute, 22:00etan hasita. Ekainean aurkeztu zutenean, zazpi kirolari zeuden pentatloiaren parte hartzaileen zerrendan, baina aldaketak izan dira hasierako zerrendarekiko. Alex Txikon lemoarra eta Jon Ander Maiza andoaindarra baja izan dira, arazo fisikoak tarteko, baina Aratz Mugertza Mugertza III.a gehitu zaio lehiari. Horrela, sei izango dira herri kirolari konpletoenaren txapelaren bila ariko direnak: Xabier Orbegozo Arria V.a (Errezil), Aritz Azpiazu Arria VI.a (Azpeitia), Luis Txapartegi (Aizarna), Jon Gisasola Zelai V.a (Mallabia), Xabier Zaldua (Zumarraga) eta aipatutako Mugertza (Mutriku). 25 aldiz 100 kiloko bola jasotzea; gizon proban bi plaza osatzea, 400 kiloko harriarekin; kanaerdiko hiru enbor moztea; 50na kiloko txingekin sei plaza osatzea; eta 3 kilometroko korrika saioa dira pentatloia osatzeko bete beharko dituzten lanak. 1990ean jokatu zuten azken aldiz euskal pentatloia, eta Joxe Mari Olasagastik irabazi zuen. Igeldokoa da txapel gehien dituena, 1983an eta 1984an ere irabazi baitzituen. Zapatuko jaialdirako sarrerak aurrez salgai jarri dituzte Azpeitiko Landetako Mendizabal tabernan, 20 euroren truke. Egunean bertan ere erosi ahal izango dira, zezen plazako leihatilan.