Anaitz Lizartza eta Itziar Bastida azpeitiarrek bi dantza txapelketa irabazi dituzte asteburuan

Anaitz Lizartza eta Itziar Bastida Elgoibarko txapelketan. (Jose Luis Lizartza) Anaitz Lizartzak eta Itziar Bastidak bi dantza txapelketa irabazi dituzte asteburuan. Zapatuan, Astigarragako Ergobia auzoko plazan jokatu zuten hamahiru bikotek gazte mailako txapelketa, eta Lizartza eta Bastida azpeitiarrak nagusitu ziren. Bigarren egin zuten Gorka Granado eta Irati Lopez sopelarrek, eta hirugarren Mikel Esnaola eta Ane Anuariz lezotarrek. Azpeitiko eta Zestoako beste sei bikotek parte hartu zuten lehian. Atzo, igandea, berriz, LXXXII. Txapelketa jokatu zuten Elgoibarren. Itziar Bastidak eta Añaitz Lizartzak irabazi zuten lehia hori ere, eta 200 euro jaso zituzten. Bigarren egin zuten Irati Lopez eta Gorka Granado sopelarrek, eta horiek 180 euro eskuratu zituzten. Hirugarren, berriz, Nagore Kerejeta eta Aner Kerejeta azpeitiarrak sailkatu ziren, eta 170 euro irabazi zituzten. Hamalau bikotek parte hartu zuten Elgoibarko Udalak Haritz euskal dantzari taldearen eta Gipuzkoako Euskal Dantzarien Biltzarraren laguntzaz antolatutako txapelketan. Horietatik zazpi ziren Azpeitikoak, Zestoakoak eta Errezilgoak.