Azpeitiko Gaztetxearen urteurren festa izango da larunbatean

https://www.youtube.com/watch?v=TKjKvWVDFzU Irailean ekin zioten ikasturteari Azpeitiko Gaztetxean, urtero egin ohi den batzar irekiarekin. Lantaldeak zehaztu, elkar ezagutu, eta lanean hasi ziren pixkanaka, eta orduz geroztik, ez dira gelditu. Hitzaldiak, jardunaldiak, bideogintza, stencil eta Photoshop tailerrak, errepresioaren aurkako mobilizazioak, lan istripuak salatzeko manifestazioa, antzerki alternatiboaren zikloa, boulder txapelketa, Bertsio Gaua, Alu Ulu antzerki foroa, film laburren txapelketa, parodia, garagardo azoka, jaiotza alternatiboen erakusketa, mikro irekia, jantoki begetarianoak, liburuen aurkezpenak, Hoi Denk Zirkue! ikuskizuna... eta beste hainbat kontu. Uztaila iritsi da, eta orain Gaztetxearen urteurrena ospatzea tokatzen da; eta ez ditu geldirik harRAPatuko. Uztailaren 21ean, larunbatean, izango da urtemuga ospatzeko festa, eta aurtengoan, bideo bidez egin nahi izan dute prestatutako ekintzetan parte hartzeko deia. Beraz, baltsak prestatzen hastera eta abestiaren letra ikastera animatu dituzte herritarrak Gaztetxeko kideek. Honako hau da abestiaren letra: "Gaztetxien urteurrena hamahirugarrena hurrena hamaiketako ta txupina izango ditugu aurrena. Gero bota baltsak ureta eman buruai mila buelta 'Azpeitiyen zer?' gaia ere jada jarri digute eta. Gaztetxera mutil ta neska bazkari faltarikan ezta musika eta jolasekin kalera joango da festa. Eta horren atzetik luntxa ziur pasako degu huntsa gauak aurrera egiteko kontzertuak dira laguntza. Daukagu Marianitoz Blai Eta Pellanbre ere bai hau ta askoz gehiagorekin egongo gara zuen zain. Dugu zuek denon beharra elkarrekin egin indarra argi baitago borroka dela geratzen den bide bakarra".