Lan istripua izan da Azpeitiko Lan Mobel enpresan, eta behargin bat zauritu da

Lan istripua izan da gaur, asteartea, goizean, Azpeitiko Lan Mobel enpresan. Makina batekin izan du istripua beharginak; Eusko Jaurlaritzaren Lan Segurtasunerako Institutuak, Osalanek, Urola Kostako Hitzari azaldu dionez, makina batean harrapatuta gelditu da langilea, eta horren ondorioz, kolpeak ditu. Larrialdi Zerbitzuak Landeta auzoko enpresara joan dira istripua gertatu eta gutxira, eta zauritutako langilea Zumarragako ospitalera eraman dute. Osalanek jakinarazi duenez, langileari frogak egiten ari dira ospitalean, baina ez du zauri larririk.