Hilaren 21etik 23ra izango da Azpeitia Cup-erako sailkapen fasea

2015eko Azpeitia Cup txapelketako partida bat. (Valen Garcia) Pazko Asteko asteburuan, apirilaren 21etik 23ra, jokatuko da Garmendipeko zelaietan mutilen kimu mailako Azpeitia Cup futbol txapelketaren sailkapen fasea. 43 taldek eman dute izena, eta horietatik lau bakarrik izango dira ekainaren 9tik 11ra jokatuko den txapelketaren azken fasean lehiatzeko txartela eskuratuko dutenak. Talde gehienak –35 talde, alegia– Euskal Herrikoak dira: Arabakoak 6, Bizkaikoak 8 eta Gipuzkoakoak 21. Azken horien artean, berriz, 13 dira Urola Kosta eskualdekoak: Lagun Onakek, etxeko klubak, lau talderekin hartuko du parte; Azkoitiko Anaitasunak hiru izango ditu lehian; Zumaiakok bi talde aurkeztuko ditu; eta Zarauzko eta Orioko talde bana ariko da Azpeitiko txapelketan. Espainiako zortzi taldek osatuko dute parte hartze zerrenda: Errioxako eta Kantabriako launa taldek. Zortzi multzotan banatuta ekingo diote taldeek sailkapen faseari; bosna taldeko bost multzo eta seinako hiru egongo dira. Lehen egunean, ostiralean, lau multzok jokatuko dute, eta zapatuan iritsiko zaie txanda beste laurei. Multzo bakoitzeko lehendabiziko bi taldeak izango dira, sailkapen fasean aurrera eginez, igandeko azken jardunaldian lehiatzeko aukera izango dutenak; hamasei, guztira. Igandean, berriz, launa taldeko lau multzotan banatuta jokatuko dute, eta multzo bakoitzeko txapeldunek lortuko dituzte ekainean lehiatzeko txartelak. Ekainean bi hitzordu Ekainaren 9tik 11ra izango da Azpeitia Cup-en barruan kimu mailako mutilen hitzordu nagusia. Apirileko sailkapen fasean txartela lortuko duten lau taldeekin batera, Espainiako Lehen Mailako klub nagusien harrobietako taldeak etorriko dira Azpeitira txapelaren bila. Bartzelona, Real Madril, Espanyol, Valentzia, Reala, Athletic, Vila-real, Sevilla, Atletico Madril eta Celta, esaterako, baieztatuta dituzte antolatzaileek. Baina kimu mailako mutilena ez da izango datorren ekaineko hitzordu bakarra. Izan ere, mutilena jokatu eta hurrengo asteburuan, 17an eta 18an, nesken Azpeitia Cup-en txanda izango da. Aurreko urteetan bezala, kasu horretan infantil mailako futbolariak ariko dira lehian. Aurten, gainera, nesken txapelketari indar berezia eman nahi diotela adierazi dute antolatzaileek, eta, besteak beste, Bartzelona, Atletico Madril edo Realeko taldeak ariko dira lehian.