Mikrobioek ospe txarra dute gizartean, askotan gaitzekin lotzen direlako. Haatik, kaltegarriak baino gehiago, onuragarriak dira beren funtzioak. Alderdi positibo hori landuko du Josu Albero Azpeitiko bizilaguak hilaren gaur eta hilaren 28an Donostiako Bagera elkartean, herritarren uste okerra ezabatzeko xedearekin.
(E. Albizu Lizaso)
Badira ezagutzen ez diren mundu batzuk, gurearen barruan dauden beste mundu batzuk, alegia. Ikusezinak dira, baina paper garrantzitsua dute bizitzaren antzerkian. Mikrobioak dira aktore nagusi, eta, nahiz eta askorentzako gaiztoaren papera betetzen duten, protagonista zintzoak dira bizitzaren obran. Horren berri ematera etorriko da Josu Albero mikrobiologoa, uste okerrak burutik kendu, eta mikrobioen mundu liluragarriko ateak zabaltzera. Bi saio eskainiko ditu: otsailaren 16an eta 28an, 19:00etan, Bagera elkartean.
Izen bitxia du lehenengo saioko hitzaldiak: Gure gorputzeko bakterio lagunak. Askorentzako, baina, mikrobioek ez dute konotazio positiborik.
Hitzaldiaren helburua, besteak beste, daukagun uste oker hori burutik kentzea izango da. Izan ere, orokorrean, mikrobioak lotzen ditugu gaixotasunekin eta gaitzekin, eta hori ez da zuzena. Horregatik, saiatuko naiz azaltzen mikrobio gehienak ez direla kaltegarriak; are gehiago, horietako asko onuragarriak direla.
Zer nolako onurak dituzte?
Mota guztietakoak. Guk mikrobiorik gabe ezingo genuke bizi. Gure hesteetan daudenek, gure heste-florako bakterioek, bitamina batzuk sintetizatzen dizkigute, immunitate funtzionamenduan zuzenean laguntzen dute eta elikagaiak digeritzen laguntzen digute. Onura asko dituzte. Kontrakoa dirudien arren, betebehar oso garrantzitsua betetzen dute patogenoetatik babesten.
Jarraitu Alberori eginiko elkarrizketa irakurtzen Irutxuloko Hitzan.
Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.
Izan Gukakide
Izan Gukakide