Txirrindulariak lasterketa hasieran. (Nerea Uranga)
Zarauztarra taldeko Haritz Erasun izan zen atzo, igandea, Lagun Onak Txirrindulari Elkarteak antolatutako 36. San Inazio sariaren irabazlea, 55 kilometroko ibilbidea eginda.
Lasterketa hasieran hainbat ihesaldi saiakera izan baziren ere, Eroski taldeko Iñigo Aramburu izan zen tropelarekiko tartea zabaldu ahal izan zuen bakarra. Kilometro askotan lasterketa buruan izan ondoren, tropeleko lau gizon indartsuenek harrapatu egin zuten Etumetako gainera iristear zegoela, eta bostek batera ekin zioten mendatea jaisteari. Jaitsieran jo zuen aurrera Haritz Erasun irabazleak eta bakarrik egin zituen Azpeitiko helmugara iritsi arteko kilometroak. Podiumean Ciclos Iturriaga taldeko Jon Ibarluzea eta Ulma taldeko Julen Otero izan zituen lagun.
Lagun Onak taldeko txirrindulariek ere lan ona egin zuten, Mikel Orbea 14. postuan eta Aratz Iraola 24. postuan sailkatu ziren.
