Amagoia Gurrutxaga kazetariak epaimahaiaren aipamena jaso du Rikardo Arregi sarietan

Amagoia Gurrutxaga erdian, saria jaso ostean. (Argia.eus) Amagoia Gurrutxaga (Matxibenta, 1971) kazetariak Rikardo Arregi kazetaritza sarietako epaimahaiaren aipamen berezia jaso du. Gaur, zapatua, banatu dituzte 28. edizioko sariak Andoaingo Bastero kulturunean, eta Berria egunkariko kazetaria saritu dute Kristiane Etxaluz ekintzaileari egindako elkarrizketagatik (Jakin aldizkariaren 212. alean plazaratu zen elkarrizketa). Gurrutxagak euskal komunikabideen lana txalotu du saria jasotzean, baina kritika egin dio horiek administrazio publikoetatik jasotzen duten tratuari: "Administrazio publikoetatik beste sektore batzuen aldean ematen zaigun laguntzari erreparatuta, ez daukat hain argi kargudun politikoek zuek bezain argi ote duten euskarazko hedabideen estrategikotasuna". Rikardo Arregi sari nagusia Sustrai Colina bertsolariak jaso du, Argia aldizkarian kaleratutako elkarrizketengatik. Kazetari Berria saria, berriz, Unai Oiartzunek jaso du, Irunero herri aldizkarian egindako lanarengatik. Informazio gehiago, Berria.eus-en.