Zapatu horretan "ilusioaren suarekin piztutako kriseiluak" aireratuko dituzte Zelai-Luzen, 20:00etan hasita. Dagoeneko eros daitezke kriseiluak, Azpeitiko Gure Esku Dagoren lokalean.
Datorren martxoaren 12an, zapatua, kriseiluen egitasmoa egingo da Azpeitian, Gure Esku Dagok eta Hitzartuk antolatuta. Eta egun horretan bertan bukatuko da ekainaren 12an independentziaz egingo den herri galdeketari atxikimendua emateko urtarrilean martxan jarri zuten sinadura bilketa.
19:30ean urtarriletik martxoaren 12ra bitartean jasotako sinadurak zenbatuko dituzte, 19:30ean. Hitzartuk, dagoeneko, gainditu du galdeketa egin ahal izateko jarri zuen 1.500 sinadurako erronka, baina sinadurak biltzen jarraitzeko erabakia hartu zuen taldeak.
Ondoren, 20:00etan, "ilusioaren suarekin piztutako kriseiluak" aireratuko dituzte Zelai-Luzen, hala nahi duten herritarrek lagunduta. Modu horretan, "herritarren unea iritsi dela irudikatuko dugu, borondatearen eta elkarlanaren argiak piztuta", azaldu dute egitasmoaren sustatzaileek.
Kriseiluak algai daude jada Azpeitiko Gure Esku Dagoren lokalean, Foru Ibilbideko 7. zenbakian, 2,5 euroren trukean. Gure Esku Dagoko kideek kriseiluak eskuratzeko deia egin dute.
Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.
Izan Gukakide
Izan Gukakide