Azpeitiko lau erremontistak hartuko dute parte Sagardoaren Txapelketan

Sagardoaren Txapelketaren aurkezpena (Maialen Andres). Erremonteko V. Sagardoaren Txapelketa sei bikotek jokatuko dute, bi multzotan banatuta. Parte hartuko dutenetako lau azpeitiarrak dira: Igor Agirrezabala, Ion Etxeberria, Aritz Etxeberria Etxeberria IV.a eta Xuban Oiarzabal Matxin III.a.  Honela osatuko dituzte lehiaketako bikoteak: A multzoan, Ezkurra-Agirrezabala, Uterga-Olazar eta Ezkurra II.a-Ion. B multzoan, Zeberio II.a-Endika, Etxeberria IV.a- Etxeberria III.a eta Matxin III.a-Barrenetxea. Bi multzotan banatuta ariko dira, eta multzo bakoitzeko bi bikote onenak finalaurrekoak jokatzera pasatuko dira. Txapelketa ostegunean hasiko da, Hernaniko Galarretan, Ezkurra-Agirrezabala Uterga-Olazarren kontra ariko dira. Oriamendi 2010 erremonteko enpresak eskerrak eman dizkie txapelketa antolatu duten sagardotegiei: "Zortzi izan dira txapelketa hau jokatzea posible egin dutenak: Oialume Zar, Petritegi, Gurutzeta, Bereziartua, Larre Gain, Altzueta, Gaztañaga eta Saizar". Sagardoaren Txapelketako aurreko urteetako irabazleak honakoak izan dira: - 2011, Juaristi-Olazar. - 2012, Oñatz-San Migel. - 2013, Matxin III.a-Etxeberria III.a. - 2014, Etxeberria IV.a-Ion.