Euskalerriaren Adiskideen Elkarteko Gobernu Batzordea Azkoitian bildu zen joan zen larunbatean, eta batzar nagusia ere egin zuen elkarteak. Hain zuzen, Arabako, Bizkaiko eta Gipuzkoako batzordeko eta Madrilgo ordezkariak elkartu ziren Insausti jauregian.
Batzarrean, besteak beste, iaz egindako jardueren memoriak eta abian jarri ziren proiektu berriak nabarmendu zituzten; esaterako, foru abolizioaren 150. urteurrenaren ospakizuna. Aipamen berezia egin zieten "erreferentziazko" gaiei, hala nola adimen artifizialari, osasunari eta emakumearen rolari. Era berean, elkartearen argitalpenen digitalizazioaz ere aritu ziren, eta 1948tik euskaraz argitaratzen den elkartearen Egan aldizkari eta buletinari buruz ere hitz egin zuten. Gainera, Baionako Arte Eder, Letra eta Zientzien Akademiarekin duen harremana azpimarratu zen.
Bestalde, kontuak eta aurrekontuak onartu, Adiskide berriak izendatu eta azken hildakoak gogoratu zituzten, hala nola Fermin Leizaola etnografoa eta Antonio Oteiza eskultorea. Galde-eskaeren tartean, Kutxa fundazioak Donostiako Eureka zientzia museoa ixteak ekarriko lukeen "galera handiaz" aritu ziren.
Ignacio Arakistain eta Karmele Castillo musikariek pianoforte eta biolontxelo kontzertu "bikainarekin" borobildu zuten batzarra, eta kideen "anaitasun" bazkariak itxi zuen topaketa.