Kirol Herri txapelketaren kanporaketa bat jokatu zuten atzo arratsaldean Azkoitian, eta dozenaka zaleren aurrean lehiatu ziren Gurea pilotalekuan aizkolariak zein harri-jasotzaileak.
Aizkolarietan, Julen Alberdi Txikia IV.a, Mikel Larrañaga, Arkaitz Etxebeste eta Xuban Kañamares aritu ziren gizonen mailan lehian. Lau aizkolari horiek 45 ontzako enbor bat zutik eta 54 ontzako hiru enbor etzanda ebaki beharko izan zituzten, eta azkoitiarrak zazpi minutu eta 55 segundoan amaitu zituen lanak, bigarren sailkatu zen Etxebeste baino hiru segundo gutxiagoan. Hirugarren sailkatu zen Larrañaga (9.26), eta laugarren Kañamares. Azkoitiko saioan denbora onena egin zuten hiru aizkolariek lortu zuten finalerdietarako txartela.
Emakumeetan, berriz, Nerea Arruti, Irati Astondoa eta Uxue Ansorregi aritu zuren lehian, eta haiek 45 ontzako eta 54 ontzako enbor bana moztu zituzten. Arruti nagusitu zen zazpi minutu eta 16 segundoan lanak amaituta, eta hamahiru segundora bukatu zituen bereak Ansorregik. Astondoak, aldiz, 9.29 denbora egin zuen. Kasu horretan, Arrutik zuzenean finalerako txartela lortu zuen, eta Astondoak zein Ansorregik bigarren aukera bat izango dute finalerdian.
Harri jasotzen, bestalde, Ainitze Zumeta, Maddi Gesalaga, Mikel Lopetegi Urra eta Beñat Telleria lehiatu ziren. Zumetak eta Gesalagak 75 kiloko zilindroarekin nahiz kubikoarekin eta 62,5 kiloko bolarekin egin zuten lan, eta aurrenekoa nagusitu zen, guztira 3.912,5 kilo altxatuta; Gesalagak, berriz, 3.637,5 kilo jaso zituen denera.
Urrak eta Telleriak, berriz, 150 kiloko kopa, 137,5 kiloko kubikoa eta 125 kiloko bola altxatu beharko izan zituzten, eta Urrak irabazi zuen saioa, 5.800 kilo altxatuta; Telleriak, berriz, 5.500 kilo jaso zituen atzo. Harri jasotzaileen kasuan, berriz, txapelketan emaitza onenak egiten dituzten hiru kirolariak igaroko dira finalera.
Hurrena, Aizarnazabalen
Hurrengo larunbatean, otsailaren 14an, bestalde, txapelketaren hurrengo kanporaketa jokatuko dute Aizarnazabalgo pilotalekuan. Aizkolari nahiz harri-jasotzaileak ariko dira lehian han ere, 17:00etan hasita. Jaialdia bertatik bertara ikusi nahi dutenek, sarrera 10 euro ordaindu beharko dute pilotalekuko leihatilan.
Aizkoran, gizonetan, Hodei Ezpeleta Bihurri, Eneko Otaño, Ugaitz Mugertza eta Oier Kañamares ariko dira lehian, eta 45 ontzako enbor bat zutik eta 54 ontzako hiru enbor etzanda ebaki beharko dituzte. Emakumeetan, aldiz, Oihana Fernandez de Barrena, Maika Ariztegi eta Malen Barrenetxea lehiatuko dira, eta 45 ontzako enbor bat eta 54 ontzako beste bat ebaki beharko dituzte. Harri jasotzen, berriz, Eider Garcia Duranak eta Leire Oleak 75 kiloko zilindroa, 75 kiloko kubikoa eta 62,5 kiloko bola jaso beharko dituzte. Gari Garmendiak eta Xabat Olaizolak, bestalde, 150 kiloko harri errektangularrarekin, 137,5 kiloko kubikoarekin eta 125 kiloko bolarekin egin beharko dute lan. Lau harri-jasotzaile horiek harriei ahalik eta jasoaldi gehien ematen saiatuko dira.
Aizarnazabalgo saioa bakarkako Kirol Herri txapelketaren bigarren kanporaketa saioa izango da, aurrenekoa Azkoitian jokatuko baitute bihar. Guztira hamalau aizkolarik eta hamahiru harri-jasotzailek parte hartuko dute txapelketan.