Anaitasuna mendi bazkunak bi hitzordu zehaztu ditu aste honetarako: batetik, gaur, asteazkena, urteko batzar orokorra egingo du Elkarguneko Herriko Plaza aretoan, 19:00etan; bestetik, urteko lehen dokumental eta hitzaldi saioa eskainiko du ostiralean.
El rio de los siete nombres dokumentala emango dute etzi Elkargunean bertan. Sergi Ricart alpinistak urtebetez Asiako Mekong ibaia zeharkatzen bizi izandako abenturak eta hausnarketak jasotzen ditu ikus-entzunezkoak. Bidaia horretan Tibet inguruan hainbat bostmilako mendi eskalatu zituen Ricartek, eta 3.000 kilometro bizikletan eginez amaitu zuen bidea, Vietnamen.
Protagonista bera Azkoitiko saioan izango da, proiekzioaren ondotik solasaldia eskaintzeko. 18:00etan hasiko da emanaldia, eta doakoa izango da.
Gaur, batzarra
Bestalde, mendi bazkunak gaur, asteazkena, urteko batzar orokorra egingo du Elkargunean. Ohi bezala, iaz egindako ekintzen errepasoa egingo dute batzordeko kideek, eta kontu ekonomikoak aztertuta, aurtengo urterako dituzten asmoen berri emango dute. 19:00etan hasiko da bilera.