Lurrikara bat izan da bart gauean Iruña Okan (Araba), baina haren dardarak Azkoitiraino iritsi dira. Lurrikarak Arabako herri horretan izan du epizentroa, baina Euskal Herriko hainbat herritan izan du eragina; tartean, Azkoitian. 00:10 inguruan nabaritu zuten lurraren dardara Iruña Okan; Espainiako Institutu Geografikoaren arabera, lau gradukoa izan da Richter eskalan. Ordea, dardara Euskal Herri luze-zabalean hedatu da, eta Azkoitian, esaterako, bi gradukoa izan da.
Lurraren dardara oso motza izan da, bizpahiru segundokoa. Azkoitiko Udaltzaingoak Gukari jakinarazi dionaren arabera, lurrikarak ez du eraginik izan herrian, eta deirik ere ez dute jaso ezeren abisurik emanez. Eusko Jaurlaritzak azaldu du ez duela erreplikarik espero, baina gaineratu du beste lurrikararen bat izaten bada bart gauekoa baino txikiagoa izango dela.