Datorren asteartean, hilak 9, zabalduko du Azkoitiko Misio Taldeak bidezko merkataritzaren denda. Talde horrek urtero zabaldu ohi du denda Gabonen atarian, eta azken urteetan bezala, aurten ere Portaleburu erakusketa aretoan jarriko dute saltokia.
Herrialde txiroetan ekoitzitako eta bitartekaririk ez duten produktuekin beteko dute Portaleburu aretoa Misio Taldekoek. Hara bertaratzen diren herritarrek, besteak beste, jakiak, jostailuak, arropa, jolasak eta bestelako hamaika produktu eskuratzeko aukera izango dute han.
Hilaren 9tik 19ra bitartean zabalduko dute denda. Astelehenetik ostiralera, goizez, 10:30etik 12:30era zabalduko dute saltokia, eta arratsaldez, 17:00etatik 19:30era bitartean. Hilaren 13an, larunbatean, ere zabalduko dute denda, baina orduan goizez irekiko dute soilik, 10:30etik 12:30era, hain zuzen.