Beste urte batez, Azkoitiko plaza jendez lepo bete zen atzo gauean andremarietako XIII. Film Laburren Lehiaketa tarteko. 22:00etan hasita egin zuten film laburren emanaldia. Aurten, zazpi lan aurkeztu dira sariketara, Azkoitiko Udalak jarritako gaia oinarri hartuta: Eta gertatuko balitz, zer?. Hautz lokalak ekoiztutako Sue filmak jaso du epaimahaiaren saria, "istorioaren borobiltasunagatik, xehetasunak kontutan hartzeko gaitasunagatik eta istorioaren koherentziagatik" .
Ikuslegoaren saria, berriz, Aberixe taldeak egindako Benetako kolpie ikus-entzunezkoarentzat izan zen. Epaimahaiaren arabera Aberixek jaso zituen plazan zeudenen partetik txalo gehien. Azken urteetan bezala, buelta bat baino gehiago egin behar izan zituzten irabazlea zein zen erabakitzeko. Finalisten artean izan ziren Txintxarrirena eta Aberixerena.
Zubiaurre igeri elkartekoek ere parte hartu zuten atzoko sariketan, eta oholtzara igotzean gogoan izan zituzten atzo Donostiako itsas zeharkaldian izandako ezbeharrean hildako laguna eta haren familia. Txalo zaparradak hartu zuen plaza.
(Argazkiak: Azkoitiko Udala)
Film laburrak, osorik ikusgai
Azkoitiko Udalak ikusgai jarri ditu atzoko sariketara aurkeztutako film laburrak. Hemen ikus daitezke:
Sue - Hautz lokala
Benetako kolpie - Aberixe
Axkoittin Gaztetxie bagenu, zer? - Azkoitiko Gazte Asanblada
Alizen oparixe - Zubiaurre Igeriketa Kluba, Master.
CTK - Samiñoko Bidoie
Gertatze eztanik - Txintxarri lokala
Bisean Bis 22.00 - Lanberzar