Tokiko merkataritza txikiaren aldeko apustuarekin jarraitzeko asmoz, udalak eta Herrixen merkatari elkarteak lankidetza hitzarmena sinatu dute. Ana Azkoitia alkateak, elkarteko lehendakaria den Larraitz Eizmendik eta elkarteko teknikari Sara Rodriguezek parte hartu dute hitzorduan.
Udalak azaldu duenez, "merkataritza dinamizatzeko eta sektorea sustatzeko, aktibatzeko zein indartzeko konpromisoa" dute bi aldeek. "Erronketako bat saltoki txikien lehiakortasuna areagotzea da, teknologia berrietara eta digitalizaziora egokituz. Ildo horretan, aurten aurrerapauso handia eman da Errekauek aplikazioa garatuz eta zerbitzua martxan jarriz", azaldu dute.
Hain justu, aurtengo martxoaz geroztik dago erabilgarri Errekauek zerbitzua. Horri esker, herritarrek Whatsapp aplikazioaren bidez egin ditzakete erosketak bai tokiko dendetan, bai azokako postuetan. Hain justu, erosketen eskaerak 688 81 87 77 zenbakiarekin harremanetan jarrita egin behar dira. Eskaera eginda, bezeroek erosketak etxean edota Berdura Plazako kontsignan jaso ditzakete.