Azkoitiko Udalak aurrekontu parte hartzaileen bidea hasi du, eta horretarako lehen pausoa berme batzordea osatzea izango da. Udalbatzak otsailean aho batez hala onartu eta gero, aurten, estreinakoz, ausaz hautatutako herritarrez osatutako batzordea osatuko du erakundeak prozesua aurrera eramateko. Udalak dagoeneko 300 gutun bidali dizkie zozketa bidez titular edo ordezko gisa hautatuak izan diren herritarrei, baina horietatik hamabost pertsonak osatuko dute taldea gero, adin eta genero desberdinetakoak.
Udalaren arabera, berme batzordea osatzearen helburua da prozesua "kalitatezkoa" izatea eta "herritarren ordezkaritza zabalagoa eta anitzagoa" lortzea. Hain zuzen, generoa eta adina ez ezik, kokapen geografikoa ere kontuan hartu du udalak zozketa egiterakoan; hau da, herrigunean edo landa eremuan bizi diren herritarrak sailkatu ditu. Era berean, jakinarazi du batzordean parte hartzea borondatezkoa dela, eta horregatik bidali ditu erakundeak batzordekide kopurua baino gutun askoz gehiago; haiek taldeko kide izan daitezen "gonbidatzeko".
Prozesuaren metodologian eragina izango du herritarren berme batzordeak: hain zuzen, kide bakoitzak bina orduko hiru lan saio egin beharko du maiatzaren 13an, irailaren 16an eta urriaren 28an. Trukean, komunitateari eskainitako denboraren zein lanaren konpentsazio moduan, kide bakoitzak 120 euro jasoko ditu.
Udalak, bestalde, gogoratu du udal talde guztiek adostu zutela otsailean onartutako konpromiso akordioa, eta ordezkari guztiek parte hartu dutela prozesuaren diseinuan. Era berean, herritarren parte hartzeari zein ekintza komunitarioari buruzko formazio saioetan ere parte hartu dute horiek.
Otsailean horrela onartu bezala, agintaldia amaitu bitartean, hau da datozen bi urteetan, gauzatuko dituzten proiektuak aukeratzeko parada izango dute udazkenera arte luzatuko den prozesuan, eta horretarako 300.000 euroko aurrekontua izango dute.
Maiatzean, ekarpenetarako epea
Maiatz bukaeran proposamenak aurkezteko epea irekiko dute, eta, besteak beste, herritarrei informazioa emateko batzar irekia deituko du udalak. Haren arabera, proposamenak aurkezteko epea hilabetekoa izango da, eta ekarpenak bildu ondoren, jasotako proposamenak gaika eta kapituluka antolatuko dira. Gero, udal teknikariek proposamen horien bideragarritasuna aztertuko dute, bozketa fasera zeintzuk pasatu daitezkeen adosteko. Hain zuzen, berme batzordearen zereginetako bat izango da bozketa fasera igaroko diren proiektu bideragarriak lehenestea.
Horrez gain, proposamenak bi taldetan banatuko dituzte: batetik, 18.000 euro baino gutxiagoko aurrekontua duten proiektuetarako 50.000 euro bideratuko dituzte, eta gainontzeko 250.000 euroak 18.000 eurotik gorako proiektuentzako izango dira.
Aurten, aurrekontu parte hartzaileen prozesuan 8 eta 18 urte bitarteko haur eta gazteek ere parte hartu ahalko dute, eta kasu horretan, ikastetxeetan landuko dute gaia.