Azkoitiko Gazte Asanbladak (AGA) laugarren urteurrena ospatuko du zapatuan, eta egun osoko egitaraua prestatu du egun horretarako. Izan ere, hainbat aisialdi ekintza egongo dira goizetik gauera, hala nola mendi lasterketak, kontzertuak eta DJen emanaldia.
10:30ean hasiko du AGAk urteurren festa, mendi lasterketarekin. Aurrenekoz prestatu dute proba San Martin auzoko Ardatz elkartetik abiatuko da, halako ekimenek "harrera ona" izan ohi dutelakoan eta Azkoitia, oro har, herri "mendizalea" delakoan. Korrikalariek 6,5 kilometro eta 300 metroko desnibel positiboa dituen ibilbide zirkularra egingo dute Munoandira.
Lasterketan parte hartzeko herriko zenbait tabernatan eman daiteke izena, baita taldearekin sare sozialen bidez harremanetan jarrita ere. Egunean bertan ere izango horretarako aukera, eta dortsalak, berriz, larunbatean elkartearen aurrean bertan edo ostiralean plazan jaso ahal izango dira. Bost euro ordaindu beharko da han parte hartzeko, dortsalaren eta aseguruaren truke. Antolatzaileek azaldu dutenez, aurreneko korrikalariei "sari sinboliko batzuk" oparituko dizkiete, baina ez da egongo sailkapenik.
Eguerdian, San Martin auzotik herrigunera eramango dute festa: 13:00etan, bafle poteoa egingo dute, eta 14:00etan, bertso bazkaria izango da Ikurrinaren plazan, Jon Gurrutxaga eta Suhar Gesalaga bertsolariekin. Bazkarira joateko, hamar euro ordaindu beharko da, baina ez dago aurrez izena eman beharrik.
Arratsaldetik aurrera, berriz, musika izango da protagonista: 19:00etan, No Limits eta Rebel Noise taldeen zuzenekoak izango dira Kontzejupean, eta 22:30ean, DJen emanaldiak Hika tabernan: Anti-X, Bibi eta Rizzi ariko dira musika jartzen.
Antolatzaileen esanetan, egun horren asmoa Azkoitiko gazteriari "aisialdi eredu alternatiboa" eskaintzea da. "Gazte asanbladatik bideratutako egun bat denez, gazteak eta helduak animatzen ditugu ekintzetan parte hartzera, denok batera egun desberdin batez disfrutatu ahal izateko", azaldu du taldeak.