Artedrama arte eszenikoen plataformak Miñan antzezlana eskainiko du datorren zapatuan, apirilak 5, Baztartxo antzokian. 19:00etan hasiko da Amets Arzallusek eta Ibrahima Balde ginearrak idatzitako Miñan liburuan oinarrituta dagoen obra. Balderen bizitza, bereziki, haren migrazio istorioa du oinarri antzezlanak.
Miñan liburua migrazio abentura baten kronika da, 2019an Baldek ahotsez kontatua eta Arzallusek idatzia. Irungo (Gipuzkoa) Harrera Sarean boluntario zebilela ezagutu zuen Arzallusek Balde, eta haren historia jaso zuen liburuan. Liburuak Zilarrezko Euskadi Saria irabazi zuen 2020an.
Artedramak iaz egokitu zuen nobela hura antzerkirako, Ander Lipusen gidaritzapean. Taula gainean erakutsiko dituzte Baldek bizitako pasadizoak eta sufritu zuen guztia; izan ere, hura Ginean kamioi batean aprendiz zebilela, amak deitu zion, etxean anaia txikia falta zutela esanez. Berri hori jakin zuenean, Balde anaiaren bila abiatu zen, eta bide horretan denetarik bizitu zuen: basamortua, pasatzaileak, polizia, bahitzaileak, egarria, gosea, mina, eta Afrikatik Europarako bidea.
Hain justu, Lipus bera, Sambou Diaby, Eihara Irazusta eta Mikel Kaye arituko dira zapatuan Baztartxon aktore lanetan. Sarrera asko saldu dira larunbaterako, baina oraindik gelditzen dira batzuk. Hain zuzen, Entradium atarian ari dira saltzen sarrerak, 10 euroan.
Gukaren zozketa
Azkoitiko Udaleko Kultura sailaren eskutik, Gukak Miñan antzezlana ikusteko bi sarrera bikoitz zozkatuko ditu bazkide diren guztien artean, bihar. Horretarako, bazkideek honako lotura honetan 'Parte hartu' botoian egin beharko dute klik. Gukak bihar 12:00etan egingo du sarreren zozketa, eta orduan jakinaraziko die irabazleei sarrera egokitu zaien edo ez.