Anaitasuna mendi bazkunak herritarrentzat bi ekintza antolatu ditu aste honetarako. Batetik, ostiralean, 2025eko Bilboko Mendi Film jaialdian eskainitako filmak izango dira ikusgai, Baztartxo antzokian. Bestetik, zapatuan, Gure Txokoak Ezagutzen egitasmoaren barruko bigarren mendi irteera egingo dute Karakate eta Irukurutzeta mendietara.
Mendi Tour deituriko bira ari da egiten Bilboko Mendi Film jaialdia, eta ostiralean, 19:00etan, Azkoitian egingo du geldialdia. Mendia izango dute ardatz ikus-entzunezkoek, eta guztira, lau film labur eskainiko dituzte ordu eta erdian: Connecting Tre Cime, Jamie, Haize lerroak eta Nupstse, I' inaccessible absolu. Sarrerak bost euroan eskuratu daitezke, aurrez Entradium atarian, eta egunean bertan, antzokiko leihatilan.
Hona hemen Mendi Filmen aurtengo emanaldien aurrerapen bideoa:
Karakatera eta Irukurutzera
Zapatuan, berriz, Karakate eta Irukurutzeta mendietara ibilaldia egingo dute herriko mendizaleek; Gure Txokoak Ezagutzen egitasmoaren barruko bigarren irteera izango da datorren asteburukoa. Elgoibarrera 07:45eko lineako autobusean joango dira, garraioa Julio Urkixo etorbideko geralekuan hartuta. Itzulera, berriz, oinez egingo dute herrira. Guztira, 18 kilometro eta 900 metro positiboko desnibela duen bidea egingo dute, Elgoibar, Karakate, Kurutzebakar, Irikurutzeta eta Azkoitia lotuz.