Hurrengo larunbatean, ekainak 12, ospatuko da XXIV. Zazpi Kurutze mendi ibilaldia. Egun horretako 04:00etan abiatuko dira mendizaleak Azkoitiko plaza nagusitik Azkoitia inguruko zazpi mendi tontor lotzera. Anaitasuna mendi bazkunak gogorarazi du, aurtengo Zazpi Kurutze mendi ibilaldian izena emateko epeak irekita jarraitzen duela oraindik.
Ibilaldian parte hartzeko asmoa dutenek, zirkuitua.com webgunean bitartez edo Azkoitiko Lopetegi Iturgintzan egin dezakete inskripzioa. Ekainaren 7ra bitartean eman ahalko da izena, aurrez 15 euro ordainduta. Aldiz, gehieneko parte hartzaile kopurua –300 lagun– gainditzen ez bada, martxaren egunean bertan ere egongo da izena emateko aukera. Ekainaren 12an, 03:00etik aurrera eman ahalko da izena plazan, orduan 20 euro ordainduta.
Anaitasuna Mendi Bazkunak bi urtetik behin –urte bikoitietan– antolatzen duen ibilbide luzeko mendi ibilaldia da Zazpi Kurutze. 54 kilometro osatu behar izaten dituzte mendizaleek Azkoitia inguruko zazpi mendi gailurretatik igaroz. Azken urteetako ibilbide bera izango du aurtengo martxak, eta honako mendi hauek lotu beharko dituzte mendizaleek: Erlo, Aittola, Zargoate, Hirukurutzeta, Irimo, Izazpi eta Oleta.