Azkoitia eta Urretxu arteko GI-631 errepidea hobetzeko lanak joan den uztailaren 20an hasi zituen Gipuzkoako Foru Aldundiak. Obra horien aurreneko faseko lanak egiten ari dira gaur egun Aizpurutxon. Bertan oinezkoentzako pasabidea eta zubia eraikitzen hasi dira. Obrak tarteko, Aizpurutxon autoentzako errei bakarra dago zabalik, eta trafikoa semaforo bidez antolatuta dago.
Aizpurutxon, Erdikobentaren eta Ibaiondoren artean, oinezkoentzat bidea eraikiko dute, galtzadaren ondoan. Era berean, oinezkoentzat bidea ibaiaren beste aldera igaroko da, horretarako eraikiko dute zubia. Egun, oinezkoek errepide ertzetik ibili beharra daukate, hori saihesteko eta haien segurtasuna bermatzeko egingo dituzte lan horiek.
Zubieder eraikuntza enpresa ari da Aizpurutxon lanean, 257.366 euroko aurrekontuarekin. Eta obrak bukatzeko aurreikusi duten epea lau hilabetekoa da; beraz, aurreikusitakoa betetzen bada, abendurako bukatuta izango lituzkete Aizpurutxon aurreikusitako obrak.