Sutea piztu da 16:00ak inguruan Azkarateko pinudi batean. Azkarate mendatearen tunelaz bestalde piztu da sua, Elgoibar, Mendaro eta Azkoitia arteko Urnobitza auzoko Ekaitz mendian. Suhiltzaileek UROLA KOSTAKO HITZAri adierazitakoaren arabera, 19:35 inguruan sugarrak Madariaga auzora ere iritsi dira. Larrialdi Zerbitzuak ere bertaratu dira Madariaga auzora. Une honetan —21:50— sutea kontrolpean dute. Gainera, suhiltzaile talde bat ingurua zaintzen ari da.
16:30az geroztik sutea itzaltzeko lanetan dira Arrateko (Eibar) eta Urolako (Azpeitia) parkeetako suhiltzaileak Gipuzkoako Basozainen agindupean. Hego haizeak "bortitz" jotzen du, eta sua itzaltzeko lanak "zaildu" eta atzeratu egin ditu. Hasiera batean sutea txikia zela zirudien arren, indar handiz zabaldu da gero. Sutearen inguruan ez dago kaltetutako baserri edo etxebizitzarik.