Euskal Herriko hainbat txokotako istorioak taularatuko dituzte Azkoitiko musika bandak, Iraurgi abesbatzak eta Sahatsa dantza taldeak datorren larunbatean, hilak 23, Baztartxon. Antolatzaileek nabarmendu dutenez, herritarrei "jakin-mina" sortuko dien ikuskizuna izango da larunbatekoa.
Pirinioen magalean izenburupean, Pirinioen "bi aldeetako magaletan" eta "hainbat ibarretan barrena" ibiliko dira ikuskizunean antolatzaileek adierazi dutenez: "Erronkari eta Zaraitzu aldeko ibar hotzetan hasiaz, Ttuttun airea duten jotak ikusi eta entzungo ditugu, Julian Gaiarreri abestu, eta Otsagabian dantza egingo dugu". Ondoren, mendebalderantz jarraituko dute taldeek, eta Bortzirietan egingo dute geldialdia ikuskizunean: "Mendebaldera bidean eta Etxalarko elezaharra berpiztuz, Bizeten lan adierazgarrienetako bat gogoraraziko dugu, eta Bidasoako Bortziriak igaroaz, Berari, Lesakari eta Arantzari dantza egingo diegu", azaldu dute ikuskizuneko kideek. Horren ostean, Irunen Luis Mariano omenduko dute eta Lapurdiko eta Zuberoako istorioak antzeztuz borobilduko dute saioa emanaldian parte hartuko duten hiru taldeek.