1962. urtetik 1971. urtera txirrindulari profesionala izan zen Sebastian Elorza azkoitiarra, eta joan den hileko azken asteburuan KAS txirrindulari taldeko gainontzeko kideekin batera omendu zuten Burgosen (Espainia). KAS taldea Burgoseko Espinosa de los Monteros herrian bildu ohi zen denboraldia prestatzeko 60. hamarkadan, eta han jaso zuten omenaldia Elorzak eta bere taldeak.
Elorza munduko hainbat itzulitan lehiatu zen, hasieran Funcor taldearekin, eta ondoren, KAS taldearekin; besteak beste, Frantziako Tourrean, Italiako Giroan, Espainiako Vueltan eta Munduko Errepideko Txirrindulari Txapelketan aritu zen. Hainbat garaipen ere lortu zituen txirrindulari azkoitiarrak, hala nola 1962ko Ordiziako Klasika, 1965eko Euskal Bizikleta eta 1969ko Errioxako Itzuliko lehen etapa.