Lelo lehiaketa jarri du martxan Azkoitiko Herrixen dendari elkarteak, azkoitiarrak merkataritza txikiaren inguruan sentsibilizatzeko helburuarekin, eta hainbat sari eskuratu ahal izango dituzte lehiaketan nahiz leloa aukeratzeko bozketan parte hartzen duten herritarrek.
Lehiaketan parte hartzeko, Herrixen dendari elkartearen facebookeko orria jarraitu berharko da. Ondoren, leloa aurkeztu beharko da; azkoitiarrez idatzita egon beharko dute leloek, eta gehienez hamar hitz izan ditzakete. Azkenik, uztailaren 15a, astelehena, baino lehen bidali beharko dute leloa parte hartzaileek, eta hiru modu daude horretarako: herrixen@herrixen.eus helbidera idatzita, Instagram edo Facebook sare sozialetatik mezu pribatu bat bidalita edo Herrixen dendari elkarteko postontzian utzita. Leloa bidaltzerakoan harremanetarako izen abizenak eta telefonoa gehitu beharko dituzte lehiakideek.
Sariei dagokionez, 50 euroko hiru bono banatuko ditu dendari elkarteak; uztailaren 29rako boto gehien lortu duen leloak eskuratuko du bono bat, lelo onena aukeratzeko bozketan parte hartutako herritarren artean zozkatuko dute beste bonoa, eta hirugarren bonoa, lehiaketan parte hartu duten lehiakide guztien artean zozkatuko dute.