Azkoitiko Udala Martirieta eta Urrategi auzoetako baserri bideak konpontzen hasiko da aste honetan. Aurreikuspenen arabera, lanek hilabete inguru iraungo dute, eta besteak beste, asfaltoa berritu eta harri-lubetak eraikiko dituzte. Martirieta auzoko Mendizabal eta Amusategi baserriei nahiz Urrategi auzoko Euzkitza eta Olaran etxeei eragingo diete lanek.
Udalak jakinarazi duenez, 199.511,26 euroko aurrekontua dute lanek. Erakundearen arabera, udalak 600.000 euro inbertitu ditu azken lau urteetan baserri bideak konpontzen, eta horretarako ahalegina egiteko prest agertu da, "baserritarren eskaera nagusia errepideak konpontzea" delako.