Antonio Oteiza fundazioak hamaika ekitaldi antolatu du Azkoitian Antonio Oteiza artista omentzeko; ekainaren 20tik 30era bitartean izango dira ekitaldiak. 2007. urtean sortu zen fundazioa orduko Azkoitiko alkateak, Asier Aranbarrik, sustatuta. Fundazioko kideen esanetan, artistak Azkoitiarekin duen "lotura estua" tarteko, eta eskultorearen artelanak "babesteko" nahiz "hedatzeko" eratu zen fundazioa, besteak beste.
Ekainaren 20an, ostirala, Oteizaren erakusketa irekiko dute Etxe Beltz jauregian, eta artista bera Azkoitian izango da erakusketaren irekieran. Oteizaren artelanez gain, bere liburuak eta argazkiak ere ikusi ahal izango dira erakusketan, besteak beste. Astelehenetik igandera egongo da erakusketa irekita, 18:00etatik 20:00etara; asteburuan goizez ere irekiko dute erakusketa, 12:00etatik 14:00etara. Ekainaren 30a bitartean egongo da zabalik erakusketa.
Ekainaren 21ean, osteguna, eta 24an, astelehena, hitzaldiak izango dira, Etxe Beltz jauregian, 19:00etan. Ostiraleko solasaldian, Edorta Kortadi arte kritikoak Oteizaren inguruan hitz egingo du, eta astelehenekoan, Iñaki Azkune historialariak Katalina Erauso izango du hizpide. Juan Bautista Mendizabal historialariak gidatuko ditu bi hitzaldiak.
Ekainaren 22an, larunbata, Oteiza Euskal Herriaren Adiskideen Elkarteko Ohorezko kide izendatuko dute, eta 20:00etan Esku harriak Oteizaren (h)aria ikuskizunaz gozatzeko aukera izango da Balda plazan, Mugmus Laborategia konpainiaren eskutik.
Ekainaren 30ean, igandea, amaituko dira Oteizaren omenezko ekitaldiak; Azkoitia eta Oteizatarrak bisita gidatua izango da Balda plazatik hasita, 12:00etan.