Eusko Jaurlaritzaren Kultura Sailak, Etxepare Euskal Institutuaren bitartez, eta Euskadiko Filmategia Fundazioaren laguntzarekin antolatutako film laburren katalogoa da Kimuak; aurtengoa 22. edizioa da, eta Izibene Oñederra azkoitiarraren Lursaguak animazioko film laburra aukeratu dute beste hainbat lanean artean. Oñederrak "poza" eta "lasaitasuna" hartu du bere lana katalogoaren parte dela jakitean, hark dioenez, filma banatzerako orduan "laguntza handia" baita Kimuak programan parte hartzea.
Lursaguak filmak Hélène Cixous frantziarraren esan bat du oinarrian. Izan ere, honako hau zioen hark: "Inoiz ezagutu ez den espezieko milioika lursagu, milaka urteko kulturaren oinarri kontzeptuala, birrintzen ari diren garai horretantxe bizi gara". Esan horretan oinarrituta ondu du azkoitiarrak bere filma.
Oñederraren filmak lehenagotik ere aukeratu izan dituzte Kimuak programarako; 2007. urteko edizioan azkoitiarraren Hezurbeltzak filma aukeratu zuten, 2013. urtean, berriz, Hotzanak filma hautatu zuten, eta horrez gain, Kimuaken izan diren beste hainbat film laburretan ere parte hartu du Oñederrak, Beti bezperako koplak lan kolektiboan, adibidez.