Atzo, astelehena, hasi zen Azkoitiko kintopeko Udaberri Idi Dema Saria. Orioko Oliden, Elgoibarko (Gipuzkoa) Soarte, Errenteriako (Gipuzkoa) Matxain eta Laudioko (Araba) Galder Bolaño lehiatu ziren atzoko saioan, Gurea pilotalekuan, 21:30ean hasita. Lau idi pare lehiatu ziren, eta haien artean Soarteren idiek egin zuten lanik onena: hain zuzen ere, 50 plaza justuak egin zituzten 1.600 kiloko Ipintza harriari tiraka.
Bigarren lanik onena Olidenen idiek egin zuten; 48plaza, zinta bat eta 0,28 metro. Haien atzetik, Galder Bolañoren idiak sailkatu ziren, 44 plaza, 2 zinta eta 2,21 metro eginda. Azkena, berriz, Matxain sailkatu zen: 40 plaza, 4 zita eta 3,68 metro egin zituzten haren idiek.
Gaur, asteartea, izango da Udaberri Idi Demaren bigarren saioa. Asteasuko (Gipuzkoa) Barriola, Aiako Izeta eta Mungiako (Bizkaia) Iñaki Lopategi ariko dira, 22:00etatik aurrera; horiek dira lehiako faboritoak. Bi saioen artean harriari itzuli gehien ematen dizkion idi parea izango da irabazlea.
Hona hemen atzoko saioko garailearen irudi batzuk:
(Argazkiak: Ibon Errazu)